Т.САЙХАН

Үндэсний их баяр наадмын шагайн харвааны тэмцээний ялагчид тодорлоо. Булган аймгийн Үлэмж дархан мэргэн Л.Түвшинжаргал ахлагчтай баг тэргүүн байрт шалгарлаа.   Хоёрдугаар байрт “Автилинк” компанийн н.Одбаяр ахлагчтай баг, гуравдугаар байрыг “Баатарномуун” компанийн н.Эрдэнэбаяр ахлагчтай багууд тус тус эзэллээ.

Монгол Улсын үлэмж дархан мэргэн Л.Түвшинжаргалын сэтгэгдлийг сонслоо.

-Сайн наадаж байна уу.  Энэ жилийн наадамд одтой байна шүү. Баяр хүргэе?

-Баярлалаа. Монгол түмэндээ үндэсний их баяр наадмын мэнд хүргэе.  Өнөөдөр  өрсөлдөөн ширүүн байлаа.  Улаанбаатар хотын н.Эрдэнэбаатар, “Шивээ Овоо”-гийн багуудтай тоглолоо. Багийн залуус маань ч сайн байлаа.

-Багийн бүрэлдэхүүнийхээ тухай ярихгүй юу. Анх удаа түрүүлж байна уу?

-Тийм ээ. Би шагайн харваан спортоор нэлээд олон жил хичээллээ. Улсын баяр наадамд зургаа түрүүллээ.  Харин багийн залуус маань анх удаагаа оролцож байна. Одоогоор залуустаа зааж, өөрөө мөн бэлтгэл сургуулиа хийж байна.  Манай багт цолтой хүн байхгүй. Бүгд Булган аймгийн залуучууд. Энэ залуустай эхний жилдээ оролцож түрүүлсэндээ баяртай байна.

Эх сурвалж: www.polit.mn