Ч.ЗОТОЛ

Хүй долоон худгийн ногоон дэнж жилийн жилд хүн, машин бужигнаж, хөл гишгэх зайгүй шахам байдаг бол энэ наадмаар тун сэлүүхэн, цаг агаар ч сэрүүхэн байна. Нийслэлийн иргэдийн олонх нь мөн албан байгууллага, хамт олноороо  амралт, аялал зугаалгаар явсан мэдээлэл байна. Амрагчид их төлөв Хөвсгөл, Архангай, Сүхбаатар аймгийн Дарьганга сумыг зорьжээ. Нөгөө талаас АСЕМ болох учраас төрийн байгууллага, албан хаагчдыг олноор нь амраасан гэсэн мэдээлэл ч байгаа юм. Иймд Хүй долоон худагт наадамчид цөөн байна. Өчигдөр Хүй мандлын дэнжид болсон наадмын нээлт хүн цөөн байсан. Өнөөдөр наадмын хамгийн оргил үе болох  соёолон насны хурдан морьдын уралдаан ч мөн хөл багатай байлаа. Өрөөр хэлбэл, наадмын хэдэн өдөрт  нийслэл тэр чигээрээ нүүгээд Хүй долоон худагт ирсэн мэт хүн, машин чихэлдэж байдаг байсан бол энэ жил тэр жишиг өөрчлөгдлөө. Наадмын зохион байгуулалт сайн, эмх цэгц сайтай, цагдаа, дотоодын цэргийн бие бүрэлдэхүүн тун сайн ажиллаж, наадамчид тав тухтай сайхан наадаж байна.  

Эх сурвалж: www.polit.mn