Ч.ОЛДОХ

Монгол түмний үндэсний их баяр, Тулгар төрийн 2225, Их Монгол Улсын 810, Ардын хувьсгалын 95 жилийн хурдан соёлонгийн уралдаанд түрүүлж торгон жолоо өргүүлсэн бор үрээний эзэн, Өвөрхангай аймгийн Хужирт сумын уугуул, Мэргэжлийн сүмогийн 68 дахь их аварга Д.Дагвадоржийн сэтгэгдлийг сонирхож, цөөн хором хөөрөлдлөө.

-Баяр хүргэе. Та 2010 онд хурдан бор соёлон айрагдуулж  байсан. Энэ жил түүнтэй зүс нэгтэй  бор соёлон түрүүллүүлээ. Сэтгэгдлээ хуваалцана уу?

-Баярлалаа. Юуны өмнө нар, хур тэгширсэн энэ  сайхан наадмын халуун мэндийг монгол түмэндээ хүргэж мэндчилье. Үнэхээр 2010 онд мэргэжлийн сүмогоос зодог тайлж ирээд,   Хүйн мандлын энэ ногоон  дэнжид   одтой сайхан наадаж, хурдан бор соёолон айргийн таваар давхиулж  байснаа санаж байна.  Түүнээс хойш тэгш ойн жил түрүүлж ирсэн энэ бор соёолон маань түүнтэй нэг угшлын адуу. Өчигдөр манай  “Унаган хурд” галаас их насны  аман хүзүү авсан. Өнөөдөр соёолонгийн түрүү авлаа. Галынхандаа, Гэрлээ ахдаа, Буяадаа, Баяраадаа бүгдээрэнд нь баярлалаа гэж хэлье. Нэг үеийн сайхан залуус хэн хэндээ түшиг бол сайхан нөхөрлөж яваадаа баяртай байна.

-Та  морио өөрөө уясан уу?

-Морийг маань манай галын Гэрлээ ах, миний найз Буяннэмэх, Дайдийхүүгийн Баяраа нар маань уяж хурдлуулж байна даа. Бид нэг галынхан, сайн нөхөд. Үе үеийн залуус нийлж монгол ёс уламжлалыг сайхан авч явж, цааш нь өвлүүлж, сурталчилж явдаг юм.

-Таныг хоёр соёлон уясан гэж байсан?

-Уг нь хоёр соёлон уясан юм. Нэг нь нэлээн дээр суучихлаа.

Эх сурвалж: www.polit.mn