Т.ДАЛАЙ

Төв цэнгэлдэх хүрээлэн дотор үүх түүхээрээ бахархах, омогшил дүүрэн үйл явдал өрнөж байхад цэнгэлдэхийн гадаа байдал арай өөр байна.  Хуушуурын худалдаа давамгайлж, түүний араас хүүхдийн тоглоомын худалдаа жагсана.  Ихэнх нь хятадын хуванцар тоглоомууд байна.  Цэнгэлдэх орох замаас эхлээд алхам ч хүрэхгүй газар бүрт хайрцагтай нь тавьчихаад зарж суугаа харагдана лээ.  Түүнийг нь харсан хүүхдүүд авах гэж уйлна. Ээж аавууд хүүхдээ аргадах гэж ядна. Хүүхдийн баяр бил үү хэмээн андуурмаар үйл явдал өрнөж байсан. Мөн баяр наадмыг наадмын хуушуургүйгээр төсөөлөх аргагүй юм. Хуушуурын үнэ өнгөрсөн жилийнхтэй адилхан 1000 төгрөг байгаа бол айраг нэг литр нь 4000 төгрөг нэг аяга нь 2000 төгрөгийн үнэтэй байна лээ. Гэхдээ энэ жил наадамд айраг ховор байгаа харагдсан.  Мөн энэ жилийн тухайд элдэв янзын сугалаа олон байна. Түүн дотроос номын худалдаа болон сугалааг наадамчид ихэд сонирхож байна лээ.  Нүүрэн дээрээ зураг зуруулахад 2-6 мянган төгрөг, монгол бичгээр өөрийн нэрээ бичүүлэхэд 5-8 мянган төгрөгийн үнэтэй байна. Энэ мэтчилэн Төв цэнгэлдэх хүрээлэнгийн гадна  худалдаа үйлчилгээний байгууллага, хувь хүмүүс иргэдэд үйлчилж байна.
Мөн энэ жил баяр наадмын зохион байгуулах хорооноос “Хуушуур фестиваль”-ийн зохион байгуулахаар болсон байна. “Хамгийн өвөрмөц хуушуур”, “Хамгийн амттай хуушуур”, “Хамгийн цэмцгэр асар” гэсэн гурван номинацид тус бүр хоёр нийт зургаан байгууллага, иргэнийг шалгаруулахаар болжээ.  

 Эх сурвалж:www.polit.mn