Ч.ЗОТОЛ

Тулгар төрийн 2225, Их Монгол Улсын 810, Ардын хувьсгалын 95 жилийн ойн их баяр наадмын хурдан  их насны морьдын уралдаанд 375  хүлэг бүртгүүлснээс 372 нь  шандас сорилоо.

Хурдан их насны морьдын уралдаанд  Өвөрхангай аймгийн Тарагт сумын  уугуул, сумын алдарт уяач Бадралын Энхбаатарын хонгор морь  түрүүллээ. Хонгор морь Хэнтий аймгийн хурдан угшилтай юм байна. Өврийн сайхан хангай нутгаас улсын наадамд сүүлийн 30 гаруй жил их насны морь түрүүлээгүй. Энэ жил анх удаа түрүү авсан нь энэ юм. Мөн сумын алдарт уяачийн уясан морь түрүү авсан нь улсын наадамд  хэний ч морь түрүүлж болно гэдгийг харууллаа хэмээн наадамчин олон дүгнэж байлаа.

Аман хүзүүнд:  Завхан аймгийн Дөрвөлжин сумын уяач Дайдийхүүгийн Баяраагийн хүрэн морь хурдаллаа. Хүрэн морь Сүхбаатар аймгийн Дарьганга сумын унаган адуу юм байна.

Айргийн гуравт: Монгол Улсын Тод манлай уяач Д.Ононгийн уясан Монгол Улсын Хөдөлмөрийн баатар,  Мэргэжлийн сүмогийн 69 дэх их аварга  Мөнхбатын Даваажаргалын  зээрд  морь хурдаллаа.

Айргийн дөрөвт: Монгол Улсын Тод манлай уяач Цэрэнгийн Хэнмэдэхийн  хонгор халзан

Айргийн тавд: Завхан аймгийн Идэр сумын уугуул, “Ашид мөнхийн зам” компанийн Нанзаддоржийн Мөнхбаягалангийн зээрд тус, тус хурдалж наадамчин олныг баясгалаа.

Эх сурвалж: www.polit.mn