Т.БАТСАЙХАН

Дэнж хотойсон Монгол наадам дэлгэр сайхан эхэллээ. Төрийн есөн хөлт цагаан туг юугаан залж, тулгандаа галаа бадраан, Төв цэнгэлдэхийн зүлэг ногоон дэвжээнээ монгол гэрээ барьж монголчууд наадмаа нээлээ. Нар хур нь тэгширсэн энэ л өдөр хүний бүрийн эх орноо гэсэн сэтгэлийг царайнаас нь, өмссөн гоёлоос нь, үг үйлдэл бүрээс нь харж болохоор байв. Энэ жилийн наадмын нээлт үзэж харах зүйл  арвинтай,  Монголчуудын сэтгэлийг нээсэн нээлт боллоо.  Төрийн есөн хөлт цагаан туг найман шаргатайгаа нар зөв гороолон орж ирэхэд, Монгол Улсын Ерөнхийлөгч есөн хөлт цагаан тугаа нар зөв тойрон дэвэхэд, “Союз-39” сансарын хүлэг хөөрөхөд, эрэлхэг шүхэрчид төрийн далбаагаа намируулан Төв цэнгэлдэх хүрээлэнд газардахад монголчууд нэгэн зэрэг уухайлан, баясаж байсан юм.  Зарим хүний нүдэнд омогшил бахархлын нулимс хурж, ахмадууд нь залбирч байгаа харагдана.   Бид ийм л сэтгэл хөдөлгөм түүхтэй ард түмэн билээ. Энэ жилийн баяр наадмыг УДЭТ-ын найруулагч Н.Наранбаатар найруулсан. Төрийн наадмыг уламжлалт баяр гэдэг утгаар нь түүхийг түлхүү оруулж өгсөн нь тодорхой. Хүннү, Ром гүрнээс эхлээд 810 жилийн тэртээх Их эзэн Чингис хааны байлдан дагуулалт, Манжуудыг дарж, тусгаар тогтнолоо бадраасан Богд хаант засаглал, Д.Сүхбаатар жанжины бүтээсэн гавьяа гээд  Монголын түүхийн дөрвөн үеийг тодорхой харуулсан нээлт болсон юм. Харин Ардчилсан хувьсгалын талаар ямар ч уур амьсгал байсангүйд зарим нэг нь гайхаж байсан юм.   Ийнхүү дөрвөн хүчтэнээрээ хамгаалуулсан зүлэг ногоон талбайдаа монголчууд төрт ёсныхоо баярыг нээлээ.  Ардын хөгжмийн гайхамшигт аялгуу,  төө ч хүрэхгүй газарт хатгасан  Монголын төрийн далбаанууд, ардын урлагийн тоглолт, уран нугаралт гээд монголчуудын эх орноо гэсэн сэтгэлийг нээсэн сайхан нээлт болж өндөрлөлөө.

Эх сурвалж:www.polit.mn