Ц.БАЯР

АСЕМ-ын бэлтгэл ажлын хүрээнд “ Чингис хаан ” олон улсын нисэх буудал шинээр онгоцны 9 зогсоол  ашиглалтад оруулж, хөөрч буух зурвасын төгсгөлийн 500 метрт хүчитгэлийн ажлыг хийж дуусгажээ. АСЕМ-ын үеэр 23 улсын 29 агаарын хөлөг ирэх бөгөөд цагийн зохицуулалтыг хийсэн учир буух зурваст ямар нэгэн асуудал үүсэхгүй хэмээн албаныхан онцолж байна. Түүнчлэн  “Буянт-Ухаа”-д шалган нэвтрүүлэх найман цэгийг иж бүрэн шинэчилсэнээс гадна олон улсын зорчигчдод зориулсан зай талбайг өргөтгөх, шинээр транзит танхим, агаарын хөлөгт суух хоолой,  хүндэт зочны төв танхимыг шинэчилж, гэрэлтүүлгийг сайжруулжээ. Олон улсын зорчигчдын явах, ирэх танхим, бизнес танхим, худалдаа үйлчилгээ, амрах өрөө зэрэг транзит танхимыг цогцоор нь шийджээ.  Танхимын бүтээн байгуулалт нийтдээ 2000 гаруй м.кв талбайг хамарснаар нисэх буудал цагт 1200 орчим зорчигчдод үйлчлэх хүчин чадалтай болж байна. Өмнө нь "Чингис хаан" Олон улсын нисэх буудал цагт 800 орчим зорчигчдод үйлчилдэг байв. Манай улс Ази, Европыг холбосон, агаарын замаар дамжин өнгөрөхөд аюулгүй байдлыг бүрэн хангасан хамгийн таатай газар зүйн байршилтай улс. Тиймээс транзит танхимыг бий болгосноор Монгол Улсаар дамжин өнгөрөх олон улсын нислэг нэмэгдэж улмаар улсын төсөвт оруулах навигацын орлого нэмэгдэх боломж бүрджээ.

Эх сурвалж:www.polit.mn