Б.МӨНХЖАРГАЛ

Удахгүй үндэсний их баяр наадам болох гэж байна. Монголчууд жилдээ ганц тохиодог цагаан сар, наадмаараа үндэсний хувцасаараа гангардаг. Наадмын гоёлоо сонгоход тань туслахаар “Торго”салоны дизайнер А.Номинтой энэ жилийн загварын чиг хандлагын талаар ярилцлаа.

-Үндэсний хувцас сонгож авахад юуг анхаарах ёстой  вэ?

-Материал сонголт хамгаас чухал.  Тиймээс эхлээд торгоо зөв сонгох хэрэгтэй. Сайн торго агшдаггүй, сунадаггүй, саа гялгар багатай ,даавуулаг байдаг. Чанартай сайн торгыг шатаахад үнс үлддэг бол муу торго хайлдагаараа ялгаатай. Нэг хэсэг хээ томтой торго моодонд орж байсан бол харин энэ жилийн торгоны сонголт өнгөн дээр тогтож байна.

-Энэ жилийн үндэсний хувцасны өнгө болон загварын хувьд ямар хандлага давамгай байна вэ?

-Өнгөний хувьд гэгээлэг хэрнээ матте буюу шохойн өнгөний хувцас тренд болж байна.  Залуу бүсгүйчүүдийн хувьд ихэвчлэн европ болон орчин үеийн хувцасны загварыг шингээсэн авангард загварын дээл өмсөж байгаа.

-Дээлний өнгийг сонгохдоо өөрийн царайнд хэрхэн тохируулж авах талаар хүмүүс тэр бүр мэддэггүй. Энэ талаар уншигчдад зөвлөхгүй юу?

-Цайвар царайтай хүнд ямар ч өнгөтэй дээл зохино. Харин бор царайтай хүнд хэт өнгөлөг болон хар бараан дээл зохимжгүй. Иймээс ч энэ жилийн тренд шохойн өнгө нь ямар ч царайтай хүнд тохирдогоороо онцлог.

-Хантааз, малгай зэрэг бусад дагалдах хэрэгслийг хэрхэн хослуулах хэрэгтэй вэ?

-Сүүлийн үед мандах төрийн малгай, дэвжих төрийн дээл, бүтэх төрийн бүс гэж үндэсний хувцсаа иж бүрнээр нь өмсөх нь ихсэж байна. Нэг өнгийн малгай, дээл, бүсийг дагнаж болохгүй. Харин өнгө уусгах эсвэл дагнасан, нэг өнгөнд огт өөр өнгийг харшуулж өгөх нь зүйтэй.

-Ихэнх монгол эмэгтэйчүүд өөрсдөө гэр бүлийнхээ дээл хувцасыг урладаг. Та мэргэжлийн хүний хувьд тэдэнд хандаж юуг зөвлөх вэ?

-Мари Катранзу тэргүүтэй алдартай дизайнерууд өнгөрсөн намар, өвлийн загварууддаа бидний нэг их тоогоогүй урлагийн элемент болох үүлэн хээгээр онцгойрч чадсан. Үндэсний шинжээ алдаагүй хэрнээ шинэлэг зүйлийг сэдэж , зохиомжлож дахин давтагдахгүй бүтээлийг урлах боломж нээлттэй байна.

-Энэ жилийн наадмын дээлнүүдийн хувьд үнэ ханш хэд байгаа вэ? Тухайлбал “Торго” салоны хувьд?

-Салон бүр л өөр өөрийн үнийн тарифтай байдаг. Торго салоны хувьд  материал болон хэмжээ, загвараасаа шалтгаалаад 600-700 мянга байна.  

Эх сурвалж:www.polit.mn