Ц.БАЯР

“Багануур” хувьцаат компани 9.870,287 ширхэг нэмэлт хувьцааг Хөрөнгийн биржээр дамжуулан олон нийтэд арилжих болсоноо өнөөдөр зарлалаа. Төрийн өмчийг хувьчлах, өөрчлөн байгуулах УИХ, Засгийн газрын тогтоолын дагуу “Багануур”  хувьцаат компанийн нэмж гаргасан хувьцааны анхдагч зах зээлийн арилжааг  тус компанийн гүйцэтгэх захирал М.Отгонбаяр, ТУЗ-ийн дарга Б. Ариунболд нар цан цохиж нээлээ. МХБ-ийн гүйцэтгэх захирал М.Болор, Андеррайтер “ТиДиБи Капитал компани”-ийн Үнэт цаасны компанийн захирал Т.Даваажав нар тус тус оролцлоо. Энэхүү нэмж гаргаж буй хувьцааны тоо ширхэг нь нийт хувьцааны 32 хувьтай тэнцэж олон нийтэд 2.650 төгрөгөөр арилжаалахыг санал болгож байна. Багануур хувьцаат компани 1978 онд байгууллагдсан. Одоогоор төрд 75, хувийн  хэвшилд  25 хувь нь байгаа  төрийн мэдлийн уул уурхайн шилдэг  ганц компани билээ. Өнөөдрийг хүртэл 37  жилийн хугацаанд 103 сая тонн нүүрс олборлож Монгол улсын нүүрсний хэрэглээний 60 хувийг дангаараа хангаж ирсэн. 2013-2015 онуудад боруулалт нь жил дараалан өсч 35.2 тэрбум төгрөгийн ашигтай ажилласан.  Ингэснээр төр өөрийн мэдлийн хувьцааны 24 хувийг ард түмэнд арилжсанаар  нийт хувьцааны 49 хувь нь хувийн эзэмшилд очно гэсэн үг юм. Жил гаруй хугацаанд ажигласан судалгааны явцад цаашид тус компанийн энгийн нэгж хувьцааны үнэ өсөх  хандлагатай байгаа тухай  “ТиДиБи Капитал компани”-ийн Үнэт цаасны компанийн захирал Т.Даваажав тайлбарласан. Ийнхүү “Багануур” хувьцаат компанийн  нэмэлт хувьцааны анхдагч зах зээлийн арилжааны захиалга  энэ сарын  4-өөс 5-ны өдрийн хооронд явагдах юм. Тус компанийн хувьцааны төрийн эзэмшлийн 75 хувийг 51 хувиас доошгүй хэмжээнд буюу  70 орчим  сая   хувьцааг нэмэлтээр гаргаж 26 тэрбум  төгрөг олон нийтээс татан төвлөрүүлэхээр тооцоолж байна. Энэ хөрөнгөөр нэн шаардлагатай байгаа техник тоног төхөөрөмжийг худалдан авч үйлдвэрлэлийн тасралгүй байдлыг ханган ажиллах, цаашдаа үйл ажиллагаагаа өргөжүүлэн шинээр ашиглалтанд орсон “Амгалан ДС” болон 2017-2018 онд ашиглалтанд орох “ДЦС-5”, “Багануурын ЦС” зэрэг компаниудад нүүрс нийлүүлэх төлөвлөгөөтэй байгаа тухай ТУЗ-ийн дарга Б. Ариунболд ярив. Андеррайтер  болох “ТиДиБи Капитал компани” нь хөрөнгө босгох тал дээр туршлагтай компани гэдгийг МХБ –ийн гүйцэтгэх захирал М.Болор нээлтийн үеэр хэлсэн.

Эх сурвалж:www.polit.mn