АСЕМ-ын дээд түвшний 11 дүгээр уулзалтын дагалдах хурлуудын нэг болох “Ази-Европын редакторуудын дугуй ширээний наймдугаар уулзалт" энэ сарын 7-8-нд Улаанбаатар хотноо болох гэж байна. Уулзалтыг Монголын талаас ГХЯ, АСЕМ-ын Бэлтгэл ажлын албатай хамтран Монголын Сэтгүүлчдийн Нэгдсэн Эвлэл хариуцан зохион байгуулах юм. Тодруулбал, "Улаанбаатар хотноо долдугаар сарын 7-9-ны өдрүүдэд зохион байгуулагдах Редакторуудын Дугуй Ширээний наймдугаар уулзалт “Ази-Европын Цахим Харилцаа” сэдвийн дор болох юм.  

Уулзалтад Ази-Европын 20 гаруй орны 30 орчим нөлөө бүхий хэвлэл мэдээллийн байгууллагын төлөөлөгчид, тухайлбал Английн ВВС-ийн “World 2020” Тэргүүн Адриан Лоуб Ван-Клэйверн, Португалийн “Португал Импренто Ассоциац”-ын Ерөнхийлөгч Жоао Палмейро, Белгийн “Мондэйл Ньюс”-ын Ерөнхий Редактор Жэй Горис, ОХУ-ын “Монголия сегодня” сэтгүүлийн Ерөнхий Редактор Юрий Крючкин, БНХАУ-ын “The paper.cn” цахим хэвлэлийн хэлтсийн дарга By Тинг болон Солонгос, Сингапур, Вьетнам, Ирланд, Польш, Бангладеш, Индонез, Филиппин, Энэтхэг зэрэг улсаас Ерөнхий редакторууд, ахлах редаторууд, гадаад улс оронд суугаа тусгай сурвалжлагч зэрэг 30 орчим төлөөлөгчид оролцоно гэдгээ мэдэгджээ.

Энэ талаар МСНЭ-ийн Ерөнхийлөгч Б.Галаарид “Редакторуудын дугуй ширээний уулзалт нь Европын орны төлөөлөгчдийн хувьд долоодугаар сарын 8-9-нд Варшав хотноо болох “NATO-гийн Дээд хэмжээний уулзалт”, Азийн мусалман шашинтай улс орнуудын хувьд “Хаврын Хари Раяа” шашных нь гол ёслол долоодугаар сарын 6-ны өдөр болох гэж байгаатай холбогдуулан тухайн орны сэтгүүлчид эдгээр арга хэмжээнд анхаарлаа хандуулах үеэр болж байгаа талтай.  Гэхдээ Монгол Улсын Засгийн газар, төрийн болон төрийн бус байгууллага, Ази Европын Сан, Германы Конрад Аденоур Стифтунг Хэвлэлийн газраас дэмжлэг үзүүлэн зохион байгуулахаар бэлтгэж буй энэ удаагийн арга хэмжээ цар хүрээгээрээ өмнөх хурлуудын түвшинд болж, Ази- Европ хоёр тивийг ойртуулан, ялангуяа сэтгүүлзүйн чиглэлээр хамтын ажиллагааг бэхжүүлэх,хоёр тивийн сэтгүүлчдийн харилцаа холбоог нэмэгдүүлэхэд чухал түлхэц болох төдийгүй Монгол Улсын гадаад сурталчилгаанд үнэтэй хувь нэмэр оруулна гэж үзэж байна" хэмээн ярилаа.

Эх сурвалж: www.polit.mn