С.САРУУЛ

Улаанбаатар хотын захирагч, Нийслэлийн Ардчилсан намын дарга Э.Бат-Үүл сонгуулийн үр дүнтэй холбогдуулан сэтгүүлчдэд мэдээлэл хийлээ. Тэрээр “Нийслэлийн Ардчилсан нам 11, МАН 34 суудал авч үнэмэлэхүй ялалт байгуулжээ. Юуны өмнө сонгуулийг маш сайн зохион байгуулж, шударга ажиллсан Нийслэлийн сонгуулийн хороонд талархал илэрхийлье. Нийслэлийнхээ нийт иргэд. Тэрдундаа биднийг дэмжсэн иргэдэд талархаж байна. Өнгөрсөн дөрвөн жил бидний бүтээн байгуулалтад дэмжсэн оролцсон. Ямар ч байсан нийслэлийнхний амьдрал шал өөр болсон гэдгийг хэн хүнгүй хүлээн зөвшөөрч байгаа. Цаашдаа ч нийслэлийн дараа дараагийн удирдлагад тавих шаардлага өндөр болсон гэдгийг шинэ удирдлага анхаарах нь зүйтэй. Сонгууль АН-ын тэрдундаа нийслэлийн Ардчилсан намын хувьд улс төрийн цунами байлаа гэдгийг би шууд хэлнэ. Цунами гэдэг бол урьдчилан тааварлах аргагүй тийм үр дүн гарах үйл явц. Бид ялна гэдэгтээ итгэлтэй байсан. Энэ сонгуулийг юу ч гэж тайлбарлалаа гэсэн үнэнд нийцнэ гэдэгт эргэлзэж байна. Бүтээн байгуулалтаас илүү харлуулсан байдлыг олон сонгогчдод төрүүлчихлээ. Монголчууд гүтгэлэг дайралтад дургүй гэдэг зүйл эргэлзээнд орлоо. Утга учиргүй гүжирдлэг, муучлан харлуулсан үйлдэл амжилтад хүрч ийм байдлаар ялдаг жишиг тогтлоо. Энэ бол нийгмийн санаа бодолд маш их хор тарьсан ийм хандлага боллоо. Ёсзүйн хувьд эргэлзээтэй байдалд оруулсан ийм улстөр болсон учраас ямар ч хүн сонгуулийн үр дүнг тайлбарлах боломжгүй.

МАН НИТХ-д үнэмлэхүй ялалт байгуулсан нь МАН-аас иргэдийн хэлдгээр бор халзан хонь байсан ч сонгогдчихоор ийм сонгууль боллоо гэдгийг маш тодорхой хэлье. Энэ бол хамгийн бодитой зүйл. Харин тайван замаар төрийн эрхийг авсан нь том ололт боллоо.

Нэг зүйлд санаа зовж байна. Ер нь улс, нийслэлийг удирдахдаа өмнөх шиг мафийнх шиг тийм байдлаар удирдах юм бол нийгэм, улс үндэстний аюулгүй байдал, ардчилалд маш ноцтой аюул учирна. Тиймээс эрх баригчид өмнөх үйлдэлдээ дүгнэлт хийх хэрэгтэй. Мафийн удирдлагын арга барилаар цааш явуулах юм бол нийгэмд тогтворгүй байдал үүсэх магадлалтай.

Сонгогчдын захиалгаар зөв сайн засаглах ёстой гэж хүсч байна. Бидний эхлүүлсэн гэр хорооллын дахин төлөвлөлт, сайн хашаа хөтөлбөр зогсох эрсдэлд орох вий гэж санаа зовж байна. Төрийн үйлчилгээний супермаркет, Найрсаг Улаанбаатар, Даншиг наадам, газрын луйврыг зогсоосон ажлуудыг үргэлжлүүлээсэй. Иргэдийнхээ итгэлийг хугалаагүй, залуусынхаа хөгжиж болно гэсэн итгэл найдварын очыг асааж чадсан гэж бодож байна” гэдгийг онцолсон юм.

Мөн тэрээр хурлын дараа сэтгүүлчдийн асуултад хариулах үеэрээ хариуцлага хүлээж Нийслэлийн ардчилсан намын даргын ажлаа өгнө гэсэн юм.

Эх сурвалж: www.polit.mn