Л.БЭХ

Шадар сайд Ц.Оюунбаатар үндэсний их баяр наадмыг зохион байгуулах талаар мэдээлэл хийлээ. Хурлын эхэнд Монгол төр үүсэн байгуулагдсаны 2225 жил, Их Монгол Улсын 810  жил, Ардын хувьсгалын 95 жилийн ойн Үндэсний их баяр наадмын хөтөлбөр албан ёсоор батлагдсаныг   Шадар сайд Ц.Оюунбаатар хэллээ. Өмнөх жилүүдийн наадмын хөтөлбөртэй ойролцоо боловч зохион байгуулалтын хувьд өөр болсон. Энэ жилийн наадамд 1225 бөх барилдаж, 2000 гаруй морь уралдах урьдчилсан тоо гарсан бол  гадаадын зочид төлөөлөгчид олноор оролцох, АСЕМ-ын хурлын эхний үйл ажиллагаа давхцахаараа  онцлогтой. Энэ жилийн баяр наадмын нээлтийн ёслол, урлаг, соёлын арга хэмжээг Төрийн соёрхолт найруулагч Н.Наранбаатарын баг  зохион байгуулахаар  шалгарсан байна.  Түүнчлэн тасалбар шаглаж зардаг явдлыг хумисан зохицуулалт хийсэн. Сүүдрэвчтэй суудал 24000, задгай суудал 16000 –ын үнэтэй байх бөгөөд цэнгэлдэхийн хажууд автомашины шинэ зогсоолыг ашиглалтад оруулж байгаа. Хүй долоон худаг, Төв цэнгэлдэх хүрээлэн рүү нийтийн тээврээр үнэгүй үйлчилнэ гэдгийг   тэрээр онцлов. Мөн  цаг агаарын  байдал хүндрэх төлөвтэй, өнөөдрөөс эхлээд гурван өдөр бороо хур их хэмжээгээр орж, зарим газар хүчтэй салхилж, үер буух магадлалтай байгааг  сэрэмжлүүлэв.

Эх сурвалж: www.polit.mn