М.ЦЭЦЭГ

“Херо” энтертайнментийн захирал Б.Баатарыг баривчилсан, студийн байрыг нь цагдаа нар битүүмжилсэн талаар тус студийн ажилчид өнөөдөр “Монгол ньюс” мэдээллийн төвд мэдээлэл хийсэн юм. Энэ үеэр тус студийн найруулагч Ц.Мөнх-Очир УИХ-ын сонгуулийн 75 дугаар тойрогт нэр дэвшигч О.Цолмонгоос албан ёсоор уучлалт гуйсан юм. Тэрээр “Манайхаас өмнө нь Намбарын Энхбаяр гуайн оролцсон 100 эрхмийн бичлэг алдагдсан. Тэрэнтэй холбоотой хэдэн зүйл хэлье. Сүүлийн үед О.Цолмон эгч рүү нөгөө хар пи-ар нь сошиалаар яваад эхэлсэн. Манайхаас алдагдсан нэвтрүүлгийг янз бүрээр эвлүүлээд, байрлалыг нь янз бүрээр солиод, дээрээс нь янз бүрийн дуу оруулаад, дүрс нэмээд хар пи-ар болгож явуулаад эхэлсэн. Сонгуулийн тухай хууль дээр өмнөх дүрсээ ашиглахыг хориглосон заалт орсон байсан. Түүнийг зөрчөөд байх шиг байна. Энд хэн хариуцлага хүлээх юм бэ. Энэ асуудал дээр О.Цолмон эгчээс хүлцэл өчье. Бидний алдаанаас болоод ийм зүйл боллоо. Энэ бичлэг ямар шугамаар алдагдсан бэ  гэдэг нь саяын энэ үйл ажиллагаанаас ойлгомжтой боллоо гэж үзэж байна” гэв.

Эх сурвалж: www.polit.mn