Б.ЭНХТУУЛ

Зун, намрын улиралд  байрандаа засвар хийдэг айл цөөнгүй бий. Харин зарим нь  шинэ жил, цагаан сар дөхүүлээд гэрээ “гоёдог”.  Тиймээс  өрх гэрийнхээ өнгийг засч буй  өрхийн тэргүүн, гэрийн эзэгтэй нарт  дараах мэдээллийг хүргэж байна.

Барилгын материал зардаг дэлгүүр хаа сайгүй байдаг ч санаандаа таарсан зүйлийг олж, авна гэдэг  тийм ч амар биш. Тиймээс  хүсэл сонирхолдоо нийцсэн, чанар, эдэлгээ сайтай, аятайхан  ханын цаасыг хаанаас хэрхэн сонгох вэ гэдгийг “100-н айл”-д барилгын материал зардаг худалдагч бүсгүйчүүдээс асууж сонирхлоо.

Герман,  Солонгосын торгон болон хулдаасан обой эрэлт ихтэй байна

Нэг үе манайхан угааж арчиж болдогоор нь Хятадын хулдаасан обойг их хэрэглэдэг байсан бол эрүүл мэндэд үзүүлэх нөлөө ,эдэлгээ даах чанарыг нь бодолцон сүүлийн үед Герман,Солонгосын торгон болон хулдаасан обойг үнэ хайрлахгүй авч хэрэглэдэг болжээ. Хамгийн чанартайд нь Германд үйлдвэрлэсэн цаас тооцогддог  гэж байна.  Хулдаасан, цаасан ,торгон гээд материалын хувьд  ялгаатай  янз бүрийн обой байна. Материалаасаа шалтгаалаад нэг боодол обойны  үнэ дээд тал нь 12,500 төг байгаа бол Оросынх дунджаар 4000, Солонгосынх 3800-9500, Хятадынх 4500 орчим төгрөг байна.

“Обой сонгоход их учир бий” гэж олон хүн хэлж байна. Нэгдүгээрт,  материалыг нь шалгана,дараа нь үнийг нь сонирхоно, эцэст нь өнгө хээг нь харна. Хэрвээ та сонголт хийж чадахгүй байгаа бол яарах хэрэггүй. Дараа нь өөртөө болоод бусдад харамсах явдал ч гарч магад . Тиймээс та худалдагчид хүнд зөвөлгөө өгөхдөө өөрийнхөө барааг муулна гэж байдаггүйг санах хэрэгтэй.

Манайхан Ази маягийн засвар их  хийлгэдэг болсон

Энэ хавьдаа л томоохонд тооцогдох барилгын их дэлгүүрээр орлоо. Тус дэлгүүр ч бас бараа, материалын өргөн сонголттой юм. Дэлгүүрийн менежер О.Батхүүгээс  ханын цаасны тухай бас асуулаа. Тэрээр  “Ханын цаасыг зөв сонгох хэрэгтэй. Дараа нь үзэмжтэй харагдуулахын тулд хоёр өөр өнгийг эмжээрээр зааглан өнгийг нь уусгах хэлбэрээр нааж болдог. Эмжээрийг хэрэглэхдээ заавал мэргэжлийн хүний зөвөлгөө авах шаардлагатай . Ер нь бидэнд хэрэглэгчид их ханддаг. Обойгоо захиалах, авчирсны дараагаар засвараа нэг мөсөн хийлгэх сонирхолтой хүмүүс ч байдаг. Манайхан сүүлийн үед Монгол зан заншлыг харуулсан Ази маягийн хана,таазны засвар их хийлгэж байгаа. Жишээ нь өрөөнийхөө хаалгануудыг сөхдөг болгох,таазандаа өрхийг нь татсан тооныг сийлбэрдэх, ханандаа унинуудыг дүрсэлсэн обой наах зэрэг монгол гэрийн тохижилтыг дуурайн засвар  хийлгэдэг айл цөөнгүй байдаг” гэсэн юм.

Эх сурвалж: www.polit.mn