С.САРУУЛ

УИХ-ын гишүүн Л.Эрдэнэчимэгийн архи ууж, тамхи татсан бичлэгийг Иргэдийн шударга шүүх ТББ-ын тэргүүн Х.Бат-Ялалт, сэтгүүлч Т.Алтаншагай нар сэтгүүлчдэд дэлгэснээр цахим ертөнцөд хүчтэй тарж байна. Зарим хүмүүс Архи, тамхины тухай хуулийг санаачилж, батлуулсан УИХ-ын гишүүн Л.Эрдэнэчимэг Төрийн ордон дахь  албан өрөөндөө халамцуу, тамхи татаж байгаа нь ёс зүйгүй үйлдэл хэмээж байгаа ч 2016 оны УИХ-ын сонгуульд нэр дэвшиж буй Т.Алтаншагай, Х.Бат-Ялалт нарыг энэхүү бичлэгийг дэлгэсэнд дургүйцэж байгаагаа илэрхийлж байна. Тодруулбал, эрх мэдэл, зөөлөн суудлын төлөө хэн нэгнийгээ  иймэрхүү байдалтайгаар ард түмэнд муухай харагдуулж, орон даяар зарлаж байгааг нь шүүмжилж байгаа юм. Л.Эрдэнэчимэг гишүүн ч бусдын адил найз нөхөдтэйгээ зугаацаж цэнгэх эрхтэй. Харин Төрийн ордон албаны өрөөнд гэдэг нь асуудал болж байгаа юм.

Нөгөө талаас анд нөхрийн хувиар хамтдаа наргиж цэнгэж бичлэгийг нь хийчихээд хулгайд алдсан дүр эсгэж суугаа Г.Уянга гишүүний хүн чанарыг  ч иргэд шүүмжилж байна. Өөрөөр хэлбэл, Л.Эрдэнэчимэгийн гишүүнтэй хамт Төрийн ордонд архи ууж тамхи татаж суугаа Су.Батболд, Г.Уянга гишүүн нар тэгээд ёсзүйтэй гэж үү гэдэг талаар олон хүн байр сууриа илэрхийлжээ. Г.Уянга гишүүн бичлэгийг утастайгаа алдсан гэж цагдаад мэдүүлсэн тухай яриа байгаа юм.

Эх сурвалж: www.polit.mn