Х.ЦОМ

"Guys" хамтлагийн дуучин Х.Бат-Ундрал хар тамхины хэрэгт холбогдоод буй. Түүнийг хотын ойролцоо нэгэн байгууллагын үйл ажиллагаанд оролцоод буцаж явахад нь цагдаа нар баривчилж өдгөө ШШГЕГ-ын харьяа Цагдан хорих 461 дүгээр ангид саатуулан шалгаж байгаа гэх. Тэгвэл муу ч сайн ч хамтлагийнх нь гишүүн, нэгэн үе салж хагацахааргүй нөхөрлөж явсан анд нь улс орон даяар муугаар зарлагдаж, төмөр торны цаана байхад  "Guys" хамтлагийнхан юу ч болоогүй юм шиг хэвлэлийн хурал зарлаж инээж баясч сууна. Х.Бат-Ундралыг хэрэгт холбогдсоны дараахан тэднийг хэвлэлийн хурал зарлахад олон нийт хамтлагийн гишүүнээ өмөөрч, хамгаалж мэдээлэл хийх нь гэж хүлээж байсан. Гэвч хамтлагийн гурван гишүүн “Goodluck” хэмээх шинэ уран бүтээлээ танилцуулж байгаагаа зарласан юм. Сэтгүүлчид тэднээс Х.Бат-Ундралын талаар асуухад  "Х.Бат-Ундралын тухайд сар гаруй хугацааны өмнө хамтлагаасаа гарсан. Хар тамхины хэргийн талаар мэдэхгүй байна. Тэгээд ч хуучин гишүүнийхээ талаар юм ярихгүй.Бид хийж байгаа уран бүтээлээрээ хамтлагийн бүрэлдэхүүнд өөрчлөлт орсон гэж үзэгчиддээ ойлгуулаад яваад байна гэж бодож байсан боловч тэр бүр хүмүүс мэдээгүй байсан байна" гэж  өөрсдөөсөө түлхсэн тайлбар өглөө. Хамтлагийн гишүүдийн энэ тайлбар олон нийтийн дургүйцлийг хүргэж, тэрдундаа цахим орчинд хүчтэй эсэргүүцэлтэй тулж байна. Тэнхлүүн явахад тэмээгээр тусалснаас тэвдэж явахад тэвэнгээр тусал гэдэг үг бий. Х.Бат-Ундрал хамтлагаасаа “жийгдэж”, хар тамхины хэрэгт холбогдоод нэр хүнд нь унасан ч найз нөхдийнхөө мөн чанарыг таньж яваа биз. Нэгэн үе ард түмний сонсдог, шинэ уран бүтээлийг нь хүлээдэг байсан  "Guys" хамтлангийнхан хүн чанаргүй зангаасаа болж олон нийтийн дургүйцлийг хүргэлээ.

Харин Х.Бат-Ундрал “Хүү нь, дүү нь, найз нь та нартаа амлая, Уугий хэзээ ч тийм зүйл хийх хүн биш” хэмээн цахим хуудсандаа бичжээ.

 Эх сурвалж: www.polit.mn