С.САРУУЛ

Ирэх дөрвөн жил төрийн жолоог атгалцах эрхмүүд хэдийнэ батламжаа авч сунгаандаа орлоо. Өмнөх жилүүдийн сонгуулиар монголчууд улстөрд бууриа олж сууриа сахьсан гишүүдээ ээлжлэн сонгож, тойрогтоо дархлагдсан гишүүд ажил хийсэн хийгээгүй өндөр сэнтий, зөөлөн суудалд тухалдаг  байсан бол энэ жилийн УИХ-ын сонгуульд нэр дэвшигчид шинэчлэлийн салхийг сэвэлзүүллээ гэж хэлж болно. Өөрөөр хэлбэл, дуучин Нара шиг сонгогдох эрхээ эдэлж байгаа шинэковууд ард түмний итгэл дээр дөрөөлж амташсан хашир гишүүдийг багагүй сандаргаж байгаа бололтой. Тухайлбал, Говь-Алтай аймгийнхан сүүлийн хэдэн сонгуульд Ц.Дашдорж, Ариунсан, Ж.Энхбаяр нараас өөр гишүүний царай харсангүй. Тэгвэл энэ жил хэний ч бодож, таамаглаагүй шинэ хүмүүс гарч ирсэн нь сонгогчдын санаа бодлыг эргүүлэх талтайг ч таашгүй.

Тэдэн дунд бие дааж дэвшинэ гээд гараад ирсэн Бэки, өмгөөлөгч Г.Батбаяр, О.Алтангэрэл,  "Босоо Хөх Монгол" хөдөлгөөний тэргүүн П.Шинжээравдан, Хүний эрхийн хуульч М.Ичинноров,  Ийгл телевизийн сэтгүүлч Т.Алтаншагай, "Гал Үндэстэн" холбооны тэргүүн Ц.Мөнхбаяр "Шударга шvvх" ТББ-ын тэргvvн Х.Бат-Ялалт, УИХ-ын гишүүн С.Ганбаатарын дүү С.Гантуяа гээд сонин содон эрхмүүд олон бий. Гэхдээ бие даагчид сонин содон гэхээсээ илүү энэ удаагийн сонгууль бөх, урлагийн авъяастнуудаар хүрээгээ тэлсэн сонгууль болох нь. Тухайлбал, Баянхонгор аймагт Олимпийн аварга Н.Түвшинбаяр дэвшиж байгаа бол “Эх орончдын эвсэл”-ээс боксын дэлхийн аварга Ч.Цэвээнпүрэв, МАН-аас аварга А.Сүхбат,  МАХН-аас улсын начин Н.Одхүү, дэлхийн аварга Х.Цагаанбаатар нар бий. Мөн Д.Сумъяабазар, Б.Бат-Эрдэнэ, Х.Баттулга гээд хууччуул ч нэр дэвшинэ. Харин урлаг соёлын оддоос дуучин Г.Эрдэнэтунгалаг, М.Нарантуяа, Бэки, МУГЖ С.Жавхлан, ардын жүжигчин Ц.Төмөрбаатар, хөтлөгч П.Анужин гээд бөхчүүдээс лав цөөдөхгүй шинжтэй. Олон жил төрийн эрхийг барьж булхай луйвраас залхсан ард түмэн энэ удаад МАН, АН-ыг сонгохгүй ч байж мэднэ. Хэрэв тэгвэл одооноос Төрийн ордондоо бөх, дуучдынхаа бүлэгт зориулсан татами, тайз хоёрыг засч байвал дээр бишүү. Н.Түвшинбаяр аваргаас эхлээд олимпийн найдвар хийгээд  ард түмэндээ ая дуугаараа бэлэг барих дуучид байгаа л байх. Ажлаа хийнгээ алжаалаа тайлж, бэлтгэл сургуулилтаа нэг дороо базааж байвал дээр бишүү. Тиймээс саарал ордонд татами, тайз хоёр засвал ямар вэ?

Эх сурвалж: www.polit.mn