Р.ОЮУН

Маргааш олон улсын хүүхдийн эрхийг хамгаалах өдөр. Энэ өдөр Хүй долоон худагт “Монгол хүү” арга хэмжээг анх удаа зохион байгуулах гэж байна. Энэ талаар “Монгол наадам цогцолбор” Орон нутгийн өмчит төсөвт үйлдвэрийн газрын дарга П.Цогтбаатараас тодрууллаа.

-Танай байгууллага санаачлан хүүхдийн үндэсний баярыг анх удаа зохион байгуулах гэж байна. Энэ арга хэмжээний онцлог нь юу вэ?

-“Монгол наадам цогцолбор” Орон нутгийн өмчит төсөвт үйлдвэрийн газраас санаачлан Сонгинохайрхан дүүргийн Засаг даргын Тамгын газартай хамтран “Монгол хүү” арга хэмжээг маргааш Хүй мандлын дэнж дээр анх удаа зохион байгуулах гэж байна. Энэ үеэр өсвөрийн үндэсний бөх, сур харваа, унадаг дугуйн аварга шалгаруулах тэмцээн, “Миний мэдэх Монгол наадам” гар зургийн болон дууны уралдаан, “Аав, ээж, би” сагсан бөмбөгийн тэмцээн, хүүхэлдэйн киноны баатрын дүрд хэн сайн хувирах вэ гэсэн арга хэмжээ болно. Энэ арга хэмжээний онцлог гэвэл хүүхдүүд тоглоомон, хиймэл морь унадаг байсан бол энэ удаа амьд морь унах, сур барьж үзэх, харвах зэрэг ахуйн соёлтой танилцана.

-Хүүхдүүдэд унуулах морьдоо хаанаас сонгож авсан бэ. Циркийн сургуультай морьд уу?

-Манай газар, нутаг Төв аймгийн Аргалант суманд байдаг. Тиймээс Аргалант сумын Засаг даргын Тамгын газартай хамтраад хүүхдүүдэд унуулах 10 гаруй номхон морийг авчруулж байгаа. Цаашид уламжлал болговол өргөжих байх. Бас нэг шинэ зүйл нь зургадугаар сарын 1-нд “Дэлхийн сүүний өдөр” гэж болдог юм байна. Тиймээс Монголын сүүний нэгдсэн холбоо энэ өдөр 10 мянган ширхэг үнээний цэвэр сүү, таргаар хүүхдүүддээ бэлэг барина.

Эх сурвалж: www.polit.mn