Н.ТЭГШ

Боловсрол, соёл, шинжлэх ухааны сайд Лу.Гантөмөр энэ албыг хашаад дөрвөн жилийн нүүр үзэж буй. Дөрвөн жил гэдэг өнөөгийн хэллэгээр нэгэн сонгуульт хугацаа. Энэ хугацаанд Лу.Гантөмөр сайд хариуцсан салбартаа чухам юу хийж бүтээв, юу амжуулав?

Энэ асуултад хариулт өгөх их амархан юм. Гуравхан өгүүлбэр. Эхнийх нь “1000 инженер” төслөөр одоо Япон улсад 300 шахам оюутан суралцаж байна. Лу.Гантөмөр сайд “...Инженерүүд ирээдүйг аварна. Ирээдүйн Монгол мэдлэгийн эдийн засагтай орон болохоос өөр сонголт байхгүй. Монголчууд шинийг санаачилж, бүтээж, түүнийгээ дэлхийд худалдаж чаддаг, ажил хийж чаддаг олон сая иргэдтэй болох ёстой. Тиймээс инженерийн боловсролд тэргүүлэх ач холбогдол өгч, Японд 1000 инженер бэлтгэх төслийг хэрэгжүүлж байгаа” гэдэг юм. Үүнээс гадна ийм зарчмаар 400 багш бэлдэж байгаа ажээ. Монголоосоо гадна Японд ч, Сингапурт ч хичээл заах чадвартай багш нар төрөн гарна гэсэн үг. Дараагийнх нь

Түүний хариуцсан яам сурагч багачууд, оюутан залуусын бүтээлч сэтгэхүйг хөгжүүлэх, бүтээлч санаа бую инновацыг дэмжих бодлого гаргаж дөрөв дэх жилдээ хэрэгжүүлж байна. “Ирээдүйн Монгол шинийг санаачилж, бүтээж, түүнийгээ дэлхий нийтэд зарж чаддаг бүтээлч иргэдтэй орон болно” гэж тэр үздэгээс тэр.

Гурав дахь нь дээд боловсролын сургалтын байгууллагад суралцагч оюутны бие даасан байдал, хариуцлага, өрсөлдөх чадварыг дээшлүүлэх, сурах бололцоог нэмэгдүүлэх зорилго бүхий “Сайн оюутан” хөтөлбөр, “Сайн оюутан хөтөлбөрийн зээлийн журам”-ыг Засгийн газрын 2016 оны дөрөвдүгээр сарын 25-ны өдөр 229 дугаар тогтоолоор тус тус баталсан юм.  Эхний 27 оюутан тавдугаар сарын 19-нд энэ хөтөлбөрт хамрагдаж эхэллээ. Салбарын сайд энэ талаар “...Сайн оюутан  хөтөлбөр хэрэгжиж эхлээд байна. Энэ  нь сургалтын  төлбөрийн дарамтнаас чөлөөлөгдөхөд чиглэгдэж байгаа. Оюутан болгон сайн суралцахыг бид хүсч байгаа. Сайн суралцах юм бол төлбөрийн дарамтгүйгээр сайн мэргэжилтэн болж сайн ажилтай золгох боломжийн  төлөө бид ажиллаж байна. Чаддаг хүн гаргаж ирснээр монгол орон өнөөдрийг  хүртэл явж ирсэн уламжлалт эдийн засгийн бүтцийг арилгахад бүх  анхаарлаа төвлөрүүлж байгаа гэж ойлгож болно. Бид гарцаа байхгүй мэдлэг бүтээдэг ард түмэн болох ёстой. Бүтээсэн мэдлэгээ дэлхийн долоон тэрбум хүнд санал болгодог ард түмэн болох ёстой” гэж онцолсон.

Лу.Гантөмөр сайдын хийсэн ажлуудаас онцолсон энэ гурван ажлаас харахад л нэг том дүгнэлт хийж болохоор. Хариулт нь их энгийн. Монголын ирээдүй сайхан харагдаж байна. Эхлэл тавигджээ. Нээрэн тэр юу хийчихэв ээ?

Эх сурвалж: “Зууны мэдээ” сонин