Х.ЦОМ

МАХН-аас 2016 оны УИХ-ын сонгуульд нэр дэвшигчид Эрх чөлөө тусгаар тогтнолын талбайд нойтон өлсгөлөн зарлаад 20 гаруй цаг болж байна. Тэгвэл өлсгөлөн зарлагчдын биеийн байдлыг Чингэлтэй дүүргийн эмнэлгээс ирж үзэх ёстой байсан ч өнөөг хүртэл үзлэгт хамруулаагүй байна. МАХН-ын дарга Н.Энхбаярын бие өчигдөр орой /2016.05.28/ 22:00 цагийн үед муудаж Чингэлтэй дүүргийн Эрүүл мэндийн төвд дуудлага өгч, түргэн тусламжийн үйлчилгээ авчээ.

Хууль ёсоор бол өлсгөлөнг эхлэхийн өмнө заавал эмчийн үзлэгт албан ёсоор хамрагдаж цус болон сахар, шээсний  зэрэг таван төрлийн шинжилгээ өгч жингээ үзүүлэн эрүүл мэндийн хувьд зохих шаардлагыг хангасан тохиолдолд өлсгөлөн зарлахыг зөвшөөрдөг юм байна. МАХН-аас нойтон өлсгөлөн албан ёсоор зарлаж байгаагаа Чингэлтэй дүүргийн Засаг дарга болон тус дүүргийн Эрүүл мэндийн нэгдэлийн удирдлагад  албан бичгээр мэдэгдэж зөвшөөрөл хүссэн ч зөвшөөрөл өгөлгүй байсаар өлсгөлөнг эхлүүлжээ. 

Өлсгөлөн эрүүл мэндийн,  эмчийн ямар нэгэн  үзлэг, хяналтгүйгээр шууд эхэлсэнээс болж өлсгөлөн зарлаж байгаа зарим хүмүүсийн цусны даралтын хэмжээ  ихсэх, буурах зэрэг биеийн байдалд өөрчлөлт орж эхэлсэн байна. Намынхан Чингэлтэй дүүргийн эрүүл мэндийн төвөөс тодруулахад “Одоогийн байдлаар Засаг даргаас өлсгөлөн зарлаж байгаа хүмүүсийг албан ёсоор эмчийн үзлэгт оруулах чиглэл өгөөгүй байна. Тэгээд ч талбай дээр байгаа хүмүүсийн тухайд нойтон өлсгөлөн биш. Зүгээр улс төрийн суулт гэсэн ойлголттой байна” гэсэн байна. Тиймээс тус намын гишүүд, дэмжигчид тангараг өргөсөн эмч хүн аль нэг албан тушаалтны гарын үзүүрээр хөдлөхгүй л бол ард түмний амь нас хамаагүй болжээ хэмээн бухимдаж буйгаа илэрхийлэв.

Эх сурвалж: www.polit.mn