Г.ГАНЧИМЭГ

Барилгын салбарт үйл ажиллагаа эрхлэн компани, аж ахуйн нэгж байгууллага, төсөл хөтөлбөр удирдаж буй албан тушаалтнууд “Барилгын салбарын зах зээлийн судалгаа, цаашдын чиг хандлага”-ыг хэлэлцлээ. Төслөө үр ашигтай боловсруулахаас эхлээд үл хөдлөх хөрөнгөө борлуулахдаа үнэгүйдэхээс аврах, ажилтан албан хаагчдаа тогтвор суурьшилтай ажлын байраар хангах, газрын зөвшөөрөл, барилга барих тусгай зөвшөөрлийг хүнд сурталгүй олж авах, хөрөнгө оруулалт хэрхэн татах, барилгын салбарын макро эдийн засагт үзүүлэх нөлөө зэргийг бодит судалгаанд тулгуурлан ярилцсан юм. Тухайлбал, төлбөрийн чадвартай эрэлт буурсан энэ үед ямар төрлийн орон сууц тохирох, барилгын салбарт даатгалын үйлчилгээг чухалчлах болсон шалтгаан, Дэлхийн банкны эдийн засагчид зах зээлийг хэрхэн дүгнэж байгаа, харилцагч түншүүдээ алдахгүйн тулд юу хийх ёстой, барилгын материалын дотоодын үйлдвэрлэл, газрын үнийн хөөсрөлт, Улаанбаатар хотод дулааны хангамжийн дутагдал хэзээ нүүрлэх, уул уурхайн салбар барилга, үл хөдлөх хөрөнгийн салбарт хэрхэн нөлөөлөх гээд олон чухал сэдвийг энэ үеэр хөндлөө.

Энэхүү арга хэмжээг Барилга, хот байгуулалтын яам, МҮХАҮТ-ын дэргэдэх Барилга,дэд бүтцийн зөвлөл, Монголын Барилгын үндэсний ассиоцаци, Монголын Барилгын материал үйлдвэрлэгчдийн холбоо, “Барилга Эм Эн” ХХК, “Орон сууцны бирж” хамтран зохион байгуулав.

Мөн Монгол Улсад барилгын салбар үүсч хөгжсөний 90 жилийн ойг угтан анх удаа “Барилга, үл хөдлөх хөрөнгийн судалгааны тайлан 2016”-г хэвлэжээ. Хэвлэлийн салбарын удирдах ажилтан, бизнес эрхлэгч, хөрөнгө оруулагчдад зориулсан энэхүү тайланд эдийн засаг, салбарын бодлого, цаашдын төлөв байдал болон тулгамдсан асуудлыг шийдвэрлэх боломж, гаргалгааг багтаасан байна.

Эх сурвалж: www.polit.mn