С.САРУУЛ

Удахгүй хүүхэд, багачуудын амралт эхэлж зуслангууд амрагчдаа хүлээж авна. Хүүхдийн зуслангууд хэзээнээс хэрхэн үйл ажиллагаагаа эхлэх талаар Нийслэлийн хүүхэд, гэр бүлийн хөгжлийн газрын мэргэжилтэн Г.Ариунгэрэлээс  тодрууллаа.

- Нийслэлийн хэмжээнд энэ жил хэдэн зуслан амрагчдыг хүлээж авах вэ?

-Нийслэлийн хэмжээнд бүртгэлтэй 35 зуслан байдгаас сүүлийн гурван  жил 20 зуслан тасралтгүй үйл ажиллагаа явуулж байна. Сонгинохайрхан дүүрэгт гурав, Сүхбаатарт зургаа, Баянзүрхэд хоёр, Налайхад хоёр, Багануурт нэг, Төв аймгийн нутаг дэвсгэрт долоон зуслан байна. Эдгээрээс Төрийн болон байгууллагын дэргэдэх зургаа, хувийн хэвшлийн 16 зуслан байна.  Энэ жил  24 зуслан үйл ажиллагаа явуулах саналаа өгсөн байна.

-Зуслангуудын төлбөрийн талаар мэдээлэл өгвөл?

-Эрхийн бичгийн нэг өдрийн дундаж үнэ 23-25 мянган төгрөг байна. Зуслангууд эхний ээлжээ ирэх сарын  08-ны өдрөөс хүлээж авна. Зуслангийн эрхийн бичгийг “Улаанбаатар чуулга” –аас борлуулж,  “SKY” их дэлгүүрийн үүднээс нэгдсэн унаагаар хөдөлнө.

-Өнгөрсөн онд хэдэн хүүхэд амарсан бэ. Эрүүл ахуй стандартыг хэрхэн сахиулах вэ?

-Өнгөрсөн жил 17831 хүүхэд зусланд амарсан байна. Хүүхдийн зуслангийн эмч, тогооч нарт “Хүүхдийн зуслангийн эрүүл ахуй” сургалтыг энэ сарын 26-нд НЭМГ, НМХГ гэсэн байгууллагуудтай хамтарч сургалт явуулна. Мөн нийслэлийн ногоон бүсийн 24 зуслангийн бэлтгэл ажил, стандартын хэрэгжилтийг хангуулах зорилгоор энэ сарын сүүлчээр холбогдох байгууллагууд хамтраад шалгалт хийнэ. Зуслангийн тоо, үйлчилгээний чанар хүртээмжийг нэмэгдүүлэх чиглэлээр зуслангийн үйл ажиллагааг дэмжин, урамшуулж 12 шалгуур үзүүлэлт, амрагч хүүхдүүдийн сэтгэл ханамжийн судалгаан дээр үндэслэн  “Хүүхдэд ээлтэй зуслан”-г өнгөрсөн жилээс  шалгаруулж эхэлсэн.

Эх сурвалж: www.polit.mn