С.САРУУЛ

 “Сайн оюутан” хөтөлбөр хэрэгжиж эхэллээ. БСШУ-ны сайд Л.Гантөмөр зээлийн шаардлага хангасан 27 оюутанд батламж гардууллаа. Ингэснээр оюутнууд сургалтын төлбөрөө өөрөө хариуцаж, эцэг эхчүүд хүүхдийнхээ сургалтын төлбөрт зориулж банкнаас авсан цалин, тэтгэврийн зээлийнхээ хүүг жилийн 5%-д шилжүүлэх боломжтой болж байгаа юм. 
2015-2016 оны хичээлийн жилд 162,500 оюутан суралцаж байгаагийн 93 хувь нь хувийн зардлаар суралцаж байна. Хувийн зардлаар суралцаж байгаа 150,980 оюутны 83 хувь нь эцэг, эхийн цалин тэтгэврийн зээлээр сургалтын төлбөрөө хийж байгаа судалгаа гарчээ.
Ерөнхий боловсролын сургуулийн ирэх гурван жилийн төгсөлт, дээд боловсролын байгууллагад суралцагчдыг харгалзан энэ хөтөлбөрт 2016 оны төсвийн жилд 100.0 тэрбум төгрөг, 2017, 2018 онд 118.0-134.0 тэрбум төгрөг тус тус зарцуулах урьдчилсан тооцоотой байгаа аж. 
Монгол Улсын Засгийн газраас “Сайн оюутан” хөтөлбөрийг хэрэгжүүлснээр оюутан сурагчдын мэдлэг, ирээдүйдээ хандах хандлага өөрчлөгдөж, бүтээмжтэй чадварлаг мэргэжилтэн бэлтгэгдэхийн зэрэгцээ өрх гэр, дээд боловсролын байгууллага болон нийгэм, эдийн засагт олон эерэг өөрчлөлтийг авч ирнэ гэж үзэж байгаа юм.
Эх сурвалж: www.polit.mn