Г.ГАНЧИМЭГ

Япон улсын Сендай хотод өнгөрсөн гуравдугаар сард 187 орны төр засгийн тэргүүнүүд оролцсон “Гамшгийн эрсдлийг бууруулах олон улсын III бага хурал” болсон юм. Энэхүү хурлаас “Гамшгийн эрсдлийг бууруулах Сендайн үйл ажиллагааны хүрээ 2015-2030” баримт бичгийг баталжээ.

Монгол Улсын Засгийн газар ч үндэсний болон орон нутгийн хэмжээнд энэхүү баримт бичгийг хэрэгжүүлэх үүрэг хүлээн ажиллаж байна. Үүний дагуу гамшгийн эрсдлийг бууруулахад хувийн хэвшлийн оролцоо, үүрэг зорилтыг гишүүн байгууллагуудад танилцуулах зорилгоор МҮХАҮТ, Онцгой байдлын ерөнхий газар хамтран “Гамшгийн эрсдлийг бууруулахад төр-хувийн хэвшлийн түншлэлийг дэмжих форум”-ыг энэ сарын сүүлчээр зохион байгуулах гэж байна.

Тавдугаар сарын 30-31-нд болох тус форумд Тайландын Вант улсын Бангкок хотод төвтэй НҮБ-ын Гамшгийн эрсдлийг бууруулах олон улсын стратеги хөтөлбөрийн Ази, Номхон далайн бүс нутгийн газраас үндсэн илтгэгч нарын баг ирж оролцох юм байна.