С.САРУУЛ

Сонгууль ойртох тусам улс төрийн хүрээний урвалт, шарвалт газар авч байна. Өөрөөр хэлбэл ашиг хонжоо хайж хэн нэгний нөмөрт нуугдсан хүмүүсийн баг хууларч эхэллээ. МАХН-аас урваж, МАН-ыг долоогчдыг УИХ-ын гишүүн Ч.Улаан, Д.Тэрбишдагва нар өнгөлж өдгөө олон түмэнд муу муухайгаараа  цоллуулж явна.

Тэгвэл урвагчдын эгнээг өнөөдөр /2016.05.16/ МХЕГ-ын даргаар ажиллаж байсан Д.Батмөнх, ОБЕГ-ын дарга асан Т.Дуламдорж, Худалдан авах ажиллагааны газрын дарга асан Д.Энхжаргал нар үргэлжүүллээ. Товчхондоо энэ гурав МАХН-ын гишүүдээс хамгийн залуугаараа өөрсдийнхөө хэмжээнд байж болох хамгийн өндөр албан тушаалд суусан хүмүүс. Ямарсайндаа Д.Тэрбишдагвыг Шадар сайд байхад “Боса” компанийн хамгаалалтын албаны дарга хийж, дээр нь Баянгол дүүргийн МАН-аас МАХН-д элсээд удаагүй залуу агентлагийн даргаар томилогдож суга татагдаж байв.

Онцгой байдлын ерөнхий газрын даргаар ажиллаж байсан Т.Дуламдорж өнгөрсөн жил МАНАН-гийн Засгийн газар байгуулах үед Монголын шуудан, Цахилгаан холбоо ХХК-ийн даргаар очих гэж МАН-ын дарга нарыг хормойдож, компанийн ажилчдад ад үзэгдэж, хөөгдөж туугдаж явсныг хүмүүс мэднэ. Мөн хормын төдийд Худалдан авах ажиллагааны газрын дарга болж дэвшсэн  Д.Энхжаргал гэх бүсгүй байна. МАХН-аас богино хугацаанд огцом дээшилж, энэ намын өнгөтэй өөдтэй ажил албан тушаалын өрмийг нь хамсан хүмүүс өнөөдөр анх хаана хэн гэгч байснаа мартсан бололтой. " Эцсийн эцэст МАХН эдгээр хүмүүсийг гуйж авчраагүй гэдгийг л санах хэрэгтэй. МАХН-аар тэтгүүлж, Д.Тэрбишдагвыг царайчилж орж ирсэн "Шадар гурван цэрэгт" МАН  ямар албан тушаал амлах бол?

Эх сурвалж: www.polit.mn