С.САРУУЛ

Их, дээд сургууль, коллеж, ерөнхий боловсролын сургууль, цэцэрлэгүүдийг төгсөлтийн баяраа Эрдмийн баяр болгож тэмдэглэхийг уриаллаа. Энэ талаар Улаанбаатар хотын Цагдаагийн газар, МОХ, Сурагчдын холбооноос мэдээлэл хийлээ.  Нийслэлийн хэмжээнд 2015-2016 оны хичээлийн жилд ерөнхий боловсролын сургуулийг 22,554 суралцагч төгсөнө гэсэн судалгаа гарсан байна. Хурлын үеэр Улаанбаатар хотын Цагдаагийн газрын Хүүхдийн асуудал хариуцсан ахлах байцаагч Т.Ариунтуяа “Нийслэлийн Боловсролын Газраас ЕБС-иудад эрдмийн баярыг тэмдэглэх зөвлөмж гаргаж дүүргийн боловсролын хэлтсүүдэд хүргүүлсэн байгаа. Хонхны баярыг аль болох эрдмийн баяр хэлбэрээр зүй зохистой тэмдэглэн өнгөрүүлэх ажлыг сургуулийн захиргаа зохион байгуулахаар  зөвлөмжид тусгасан. Хонхны баярын арга хэмжээний үеэр сурагчдаас гэмт хэрэгт холбогдож, архидан согтуурах зөрчил гаргасан тохиолдолд сургуулийн захирлуудад хариуцлага тооцно. Цагдаагийн газраас хонхны баяр тэмдэглэх талаар хамтарсан удирдамжийг баталж хэлтсүүддээ хүргүүлсэн” гэв.  

Эх сурвалж: www.polit.mn