С.УЯНГА

Улаанбурхан өвчний дэгдэлт намжаад байгаа ч манай улс идэвхтэй тэмцэж байна. НЭМХ, ЭМСЯ, ДЭМБ-аас нийгмийн харилцаанд хамгийн их оролцдог 18-30 насныхныг улаанбурхан өвчний нэмэлт дархлаажуулалтад хамруулах аяныг өнөөдөр эхлүүллээ. Уг арга хэмжээ энэ сарын 25-ныг хүртэл 14 хоног үргэлжлэх юм. Энэ хугацаанд 18-30 насныхан харъяалал харгалзахгүйгээр өөрт хамгийн ойр байгаа эмнэлэг, эрүүл мэндийн төв, явуулын цэгүүдэд очиж вакцинаа төлбөргүй хийлгэж чигчий хуруун дээрээ тусгай тэмдэглэгээ тавиулах юм байна. Өндөгний харшилтай болон жирэмсэн эмэгтэй­чүүд вакцин хийлгэхгүй.Энэ талаар ХӨСҮТ-ийн захирал Д.Нямхүү “ Манай улсад 18-30 насны 600 мянга гаруй залуус байна. Энэ насныхныг дархлаажуулалтад бүрэн хамруулах нь улаанбурхан өвчний тархалтыг бууруулах, дахин дэгдэлт гарахаас сэргийлэх, дархлаа тогтсон ээжээс дархлаатай нярай төрөх зэрэг ач холбогдолтой юм.

Дархлаажуулалтын цэгүүд ажлын өдөр 09:00-19:00, бямба гаригт 09:00-17:00 цаг хүртэл ажиллана. Жирэмсэн болон ямар нэг өвчний цочмог үедээ байгаа, сүүлийн нэгэн сарын хугацаанд ямар нэг вакцин хийлгэсэн, өндөгний харшилтай залуус вакцин хийлгэх хориотой. Нэмэлт дархлаажуулалтад орохын өмнө эмчийн үзлэг хийнэ” гэсэн юм.

Түүнчлэн 2-3 сартай хүүхэд улаанбурхан өвчин тусч байгаа нь эцэг эхчүүдийн дархлаа сул байгаатай холбоотой аж. Тиймээс залуусыг вакцинд бүрэн хамруулж байж улаанбурхан өвчний тархалтыг  зогсоож, халдварыг тэглэх нөхцөл бүрдэнэ гэж үзэж буйгаа мэргэжлийн хүмүүс хэлж байв.

“Улаанбурхан өвчний эсрэг хамтдаа” уриатай 14 хоногийн аяныг Нийгмийн эрүүл мэндийн хүрээлэн зохион байгуулж байгаа бөгөөд тус  байгууллагын захирал Б.Цогтбаатар “Нэмэлт дархлаажуулалтын аяны хүрээнд хийх улаанбурхан-улаанууд өвчний эсрэг вакцины зардлыг Засгийн газраас гаргаж, НҮБ-ын Хүүхдийн сангийн шугамаар авсан. Вакцин хийх явуулын цэгүүд хүн ам олонтой байгууллага, их дээд сургуулиуд дээр байршина. 1986-1998 онд төрсөн залуусын энэ вакцинд хамрагдалт бага байдаг учраас  дэгдэлтэд өртөмхий байна. 18-30 насны залуусыг вак­циндаа идэвхтэй хам­рагдаж, иргэний үүргээ биелүүлэхийг мэр­гэжлийн байгууллагууд уриалж байна” гэсэн юм.

Вакциныг дэлхийн 100 гаруй оронд нийлүүлдэг тул чанарт эргэлзэх хэрэггүй гэдгийг НҮБ-ын Хүүхдийн сангийн суурин төлөөлөгч Роберто Бэнес онцолсон. Дархлаажуулалтын цэг байгуулах, орон даяар дархлаажуулалт хийх учраас 350 орчим сувилагчийг давтан сургалтад хамруулжээ.

Эх сурвалж: “Зууны мэдээ” сонин