Б.ЗАЯА

Сүхбаатар дүүргийн I хороо Үндэсний номын сангийн баруун талд төв зам дагуу байрлах барилгын хашаан дээр “Хонконгийн “Chuangs” группийн хөрөнгө оруулалттай “Монголиа проперти девелопмент” компани нь 2015 оны ажлын гүйцэтгэлийн мөнгөө нэн даруй төлөхийг шаардаж байна. Бидэнтэй санхүүгийн тооцоогоо дуусга”, “Хонконгийн “Chuangs” группийн хөрөнгө оруулалттай “Монголиа проперти девелопмент” компани нь бидний хөлс хүч, хөдөлмөр шингэсэн ажлын мөнгийг бүрэн төлж барагдуулахыг шаардаж байна”, “Грийт гоулд стар компанийн та бүхэн үйл ажиллагаагаа зогсоо, бидний хийсэн бүтээсэн ажлын талбайг чөлөөлж, ажилчдаа гаргахыг шаардаж байна” гэх зэрэг эсэргүүцлийн үгстэй самбар нэлээд хэд хонов. Ажилчдын эрх ашиг хөндөгдсөн агуул­гатай зарлалын самбарын мөрөөр сурвалжлав.

Тус барилгыг 2012 оноос суурийг нь тавьж эхэлсэн бөгөөд 26 давхар оффисийн барилга барихаар төлөвлөж буй юм байна. Албан ёсны нэршил нь Олон улсын санхүүгийн төв буюу олон улсын томоохон банк, бизнесийн байгууллага, хөрөнгийн бирж, санхүүгийн институт, дотоод болон гадаад арилжааны төвүүдээс гадна өндөр зэрэглэлийн дэлгүүр, ресторан байрлаж, үйл ажиллагаа явуулах зураг төсөлтэй барилга аж. Захиалагч нь Хонконгийн хөрөнгө оруулалттай “Chuangs” группийн Монгол дахь салбар “Монголиа проперти девелопмент” компани. Эсэргүүцэл илэр­хийлж барилгын хашаан дээр зарлал тавиад байгаа нь тус барилгын суурийг гүйцэтгэгч “Шинэ зуун” компани юм байна. “Шинэ зуун” компанийн ерөнхий инженер Г.Равдандаштай уулзлаа. Тэрээр “Бид 2012 онд суурь цутгалтын ажлыг эхлүүлсэн. Доош хоёр давхраас 0 давхар хүртэл барих гэрээтэй. Манайх 2015 оны наймдугаар сарын 29-нд барилгын ажлаа дуусгасан. Тэд үр­гэлж­лүүлж барих ажилд дахиад тендер зарлах ёстой байсан. Тендер зарлана гэж хэлээд компанийн хүмүүс алга болсон. Бид гурван жил орчим санхүүжилтээ аваагүй. Барьцаа мөнгөө л авсан. Одоо таван сая гаруй ам.доллар авах ёстой. Гүйцэтгэлийн мөнгөө авч чадаагүй учир зээлээр барилгын материалаа авч ажилчдаа хагас дутуу цалинжуулж байсан. Би л гэхэд сүүлийн хэдэн сар цалингүй ажиллаж байна. “Монголиа проперти девелопмент” компани санхүүжилтээ өгөхгүй, удирдлагууд нь гадаадад байгаа гэсэн шалтгаанаар олддоггүй. Гэтэл саяхнаас “Грийн гоулд стар” гэх компани гүйцэтгэлийн ажил дээр ороод ирээд биднийг хөөж эхэлсэн. Санхүүжилтээ аваагүй, дээр нь барилгаа хүлээлгэж өгөөгүй байхад “Монголиа проперти девелопмент” компани өөр компанитай гэрээ хийсэн нь хачирхалтай санагдаж байна. Одоо “Грийн гоулд стар” компани манайх хоёр нэгнийгээ хөөж туусан хүмүүс байна” гэлээ.

Зураг төслөөр бол Олон улсын санхүүгийн төвийн уг барилга 2017 онд дуусах ёстой. Нийт 500 гаруй ам.метр талбайтай гэнэ.

Ерөнхий инженерийн ярьснаар бол 200 хятад, 100 гаруй монгол ажилчин ажиллуулсан бөгөөд санхүүжилтгүйгээс болж цалингаа гүйцэд тавьж чадахгүй байгаа гэнэ. “Монголиа проперти девелопмент” компаниас санхүүжилтээ удаа дараа нэхсэн ч шийдэж өгөхгүй хугацаа алдаж байгааг ч хэлэв.

Барилгыг үргэлжлүүлэн барихаар орж ирсэн “Грийн гоулд стар” компанийн ажилчид ажлаа хэдийнэ эхэлжээ. Биднийг очиход хятад голдуу ажилчид байв. Тэднийг хариуцаж буй монгол эмэгтэйгээс зарим зүйлийг тодруулах гэсэн боловч “Бид мэдээлэл өгөх эрх мэдэлтэй хүмүүс биш. Бидний эрх ашиг яаж хөндөгдөхийг ч мэ­дэхгүй байна. Дарга нараас асуу” гэв.

Хотын төв цэгт эсэргүүцлийн самбарууд ха­даастай, барилгын  талбай дээр ажилчид нэг­нийгээ хөөж тууж, ца­лин хөлсөө авч чадахгүй байгаа энэ асуудалд ха­риулт өгөх хүмүүс нь “Монголиа проперти девелопмент” компанийнхан. Тус компанийг сураглавал ба­рилгын талбайгаас холгүй Энхтайваны гүүрний баруун талд оффис нь байрладаг аж. Дээрх мэдээлэлд ха­риулт авахаар очиход хоёр бүсгүй, нэг залуу угтаж авав. Тэд “Манай захи­рал, удирдлагууд гадаа­дад байгаа. Мэдээлэл өгөх боломжгүй” гэсээр буцаав.

Эх сурвалж: “Зууны мэдээ” сонин