С.СОР

Нийслэлийн боловсролын газраас зургаан настан болон цэцэрлэгийн хүүхдүүдийг наймдугаар сарын 22-26-ны хооронд бүртгэх болсон талаар мэдээлсэн. Энэ жилийн тухайд сургууль, цэцэрлэгүүдийн анги дүүргэлт, ачааллаас шалтгаалан элсэгчдийн хамран сурах тойргийг өөрчилсөн байна. Шинэчлэн баталснаар Алтай хотхонд амьдардаг айлын хүүхэд дүүрэг хорооны харъяаллаар хол явж сурахгүй ХУД-ийн оршин суугаа газартаа хамгийн ойр сургууль, цэцэрлэгт сурахаар зохицуулж өгчээ. Харин шинээр ашиглалтад ороод байгаа Буянт-Ухаа-2 хорооллын хүүхдүүд хамран сурах тойргийн дагуу ХУД-ийн Буянт-Ухаа-2  хороололд хамгийн ойр сургууль цэцэрлэгт суралцах юм. Буянт-Ухаа-2 хорооллын цэцэрлэг хэзээ ашиглалтад орох талаар Нийслэлийн боловсролын газрын дарга Ц.Отгонбаганаас тодруулахад “Цэцэрлэг бэлэн байгаа ч улс худалдаж авч байж ашиглалтад оруулна. Улс орон эдийн засгийн хямралтай, тус цэцэрлэгийн мөнгө төсөвт суугаагүй учраас энэ жилдээ ашиглалтад орохгүй. Хэрэв ирэх онд мөнгө нь төсөвт суух юм бол ашиглалтад оруулах асуудлыг ярина. Одоогоор хэдэн төгрөгөөр үнэлэгдэхийг ч ярилцаагүй байна” гэлээ.

Эх сурвалж: www.polit.mn