Б.ЭНХ

Баянзүрх, Хан-Уул, Сонгинохайрхан дүүрэг нь хүн амын хувьд нягтаршил ихтэй учир хүүхдийн эмнэлэгүүд ачаалал өндөртэй ажиллаж байгаа бөгөөд цаашид ч энэ байдал үргэлжлэх хандлагатай байгаа юм. Сүүлийн үед улаанбурхан өвчний тархалт ихэссэнтэй холбоотойгоор хүүхдийн эмнэлэгийн ачаалал их байгаа энэ үед сайхан сэтгэлийн үүднээс хүүхдүүдэд тусламжийн гараа сунгаж байгаа хүмүүс цөөнгүй байна. Тэдний нэг бол Баянзүрх дүүргийн  залуу багш нар юм.

Баянзүрх дүүргийн “Залуу багш нарын холбоо”-ноос хүүхдийн сайн сайханд зориулагдах “1000 ТӨГРӨГ - 1000 ХАЙР” аян санаачлан зохион байгуулжээ. Үүний үр дүнд Баянзүрх дүүргийн ерөнхий боловсролын нийт 19 сургуулийн багш, ажилчдаас 1000 төгрөг цуглуулж, цугларсан хандивын мөнгөөрөө Баянзүрх дүүргийн нэгдсэн эмнэлэгийн хүүхдийн тасагт хүчилтөрөгчийн аппарат болон цэр соруулах аппарат авч бэлэглэсэн байна. Баянзүрх дүүрэг нь 0-18 насны 100 мянган хүүхэдтэй бөгөөд дүүргийн ихэнх хүүхдүүд тус эмнэлгээр үйлчлүүлдэг тул аппарат, тоног төхөөрөмжийн дутагдал маш их байдаг аж.  

Хүүхдийн эмнэлгийн ачаалал ихсэх үед 30-40 хүүхэд яаралтай тусламжийн тасагт эмчлүүлэх шаардлага гардаг ба нэг хүчилтөрөгчийн аппарат нь дөрвөн хүүхдийн амь насыг аврах боломж олгодог байна. Харин цэр соруулах аппарат нь бага насны болон нярай хүүхдийн өвчлөлийн үед нэн шаардлагатай төхөөрөмжүүдийн нэг гэдгийг эмч, сувилагч нар ярьж байв. Тус эмнэлгийн хамт олон болон эмнэлэгт хэвтэн үйлчлүүлж буй эцэг эхчүүд, хүүхдүүд Баянзүрх дүүргийн залуу багш нарт баярласанаа илэрхийлж, хэзээд хүүхдийн сайн сайханд бүхнээ зориулдаг багш нарын маань ажил үйлс нь дэлгэрэх болтугай хэмээх ерөөл тавьжээ.

 Эх сурвалж: www.polit.mn