С.СОР

Нийслэлийн боловсролын газраас нэгдүгээр ангид элсэгчдийн талаар мэдээлэл өглөө. 2016-2017 оны нэгдүгээр ангид элсэх зургаан настай 27629, аравдугаар ангид суралцагч 6862 элсэх судалгаа гарчээ. Нийслэлийн боловсролын газрын даргын тушаалаар ЕБС-ийн нэгдүгээр ангид элсэгчдийг 2016 оны наймдугаар сарын 22-26-ны өдрүүдэд бүртгэж удирдлагын мэдээллийн системд оруулах юм байна. Түүнчлэн нэгдүгээр ангид 2010 оны нэгдүгээр сарын 01-нээс 2010 оны арванхоёрдугаар сарын 31-нийг дуусталх хугацаанд төрсөн бүх хүүхдийг бүртгэнэ. Харин 2011 оны нэгдүгээр сарын 01-нээс хойш төрсөн 5 настай хүүхдийг бүртгэхгүй юм байна. Элсэгчид төрсний гэрчилгээний эх хувь болон хуулбар, эцэх эх болон асран хамгаалагчийн иргэний үнэмлэхний эх хувь болон хуулбар, цээж зураг, үл хөдлөх хөрөнгийн гэрчилгээний лавлагаа авах ёстой юм. Энэ үеэр Нийслэлийн боловсролын газрын дарга Ц.Отгонбагана “Элсэгчдийн хамран сурах тойргийг анги дүүргэлт ачааллын улмаас шинэчлэн баталсан. Тухайлбал, Алтай хотхоны айлуудын хүүхдүүд дүүргийн харъяаллаар хол явж сурахгүйгээр Хан-Уул дүүрэгт байрлах ойр сургууль, цэцэрлэгт суралцахаар зохицуулж өгсөн. Тиймээс элсэгчдийг бүртгэхдээ шаардлагатай үед үл хөдлөх хөрөнгийн гэрчилгээ болон лавлагааг үзнэ. Хамран сурах тойргийн хүүхдүүдээс элсэлтийн шалгалт авахгүй, төлбөр хураахгүй” гэлээ.

Эх сурвалж: www.polit.mn