Б.ТУУЛ

Монголын сэтгүүлчдийн нэгдсэн эвлэл болон “Эрдэнэт үйлдвэр” ХХК хамтран Монгол Улсын бүх хэвлэл мэдээллийн байгууллага, сэтгүүлчдийн дунд “Нийгэмд тустай сайн мэдээ түгээх аян”-ыг эхлүүлж, өнөөдөр албан ёсны нээлтээ хийлээ.  Уг аян нь өнөөдрөөс эхлэн арванхоёрдугаар сарын 20 хүртэл үргэлжлэх юм байна. Аяны хүрээнд хэвлэл мэдээллийн хэрэгслүүд болон  сэтгүүлчид радио, сонин, сайтдаа нийтэлж, нэвтрүүлсэн сэтгүүлзүйн бичлэгийн нэг төрөл зүйл болох “мэдээ”-гээр оролцож, “Нийгэмд тустай сайн мэдээ түгээх аян”-ы албан ёсны фэйсбүүк хуудсанд байршуулах ёстой гэдгийг албаныхан хэлэв. Тус байгууллагын фэйсбүүк хуудсанд байршуулсан мэдээ бүрийг бичлэгийн шагналд тооцож, урамшууллын сар бүр тухайн хэвлэл мэдээллийн байгууллагын дансанд шилжүүлнэ гэдгийг зохион байгуулагчид хэлж байв. Харин шалгаруулалтыг оны сүүлчээр зохион байгуулах бөгөөд хамгийн сайн телевиз, радио, сэтгүүл, сонин, цахим мэдээ гэсэн номинациудаар тус тус гурван байр эзлүүлж, цом, өргөмжлөл, мөнгөн шагнал, редакцид шаардлагатай тоног төхөөрөмжөөр шагнахаар болжээ.
Монголын сэтгүүлчдийн нэгдсэн эвлэлийн Ерөнхийлөгч Б.Галаарид ““Эрдэнэт үйлдвэр” компани нийгэмд сайн мэдээ түгээх хэрэгтэй гэсэн санаачилга гаргаж, бид зохион байгуулахаар болсон юм. Нийгэмд тустай сайн сайхан мэдээлэл түгээх соёлыг хэвшүүлэх, гэгээрүүлэх үйлсэд хэвлэл мэдээлэл, сэтгүүлзүйн салбарынхныг идэвхжүүлэх, олон нийтэд хэрэгтэй, тустай мэдээллийг илүү чухалчилан түгээдэг хэвлэлийн байгууллагыг олшруулах зорилгоор уг аяныг зохион байгуулж байна. Хүнд хэрэгтэй, нийгэмд тустай байх нь сайн мэдээний гол шалгуур юм” гэв.

Эх сурвалж: www.polit.mn