Нийслэлийн Засаг дарга Б.Пүрэвдагва өнөөдөр хэвлэлд өгсөн ярилцлагадаа Туулын хурдны замын төслийн хариуцлагын асуудлыг хуулийн байгууллагын шалгалт, шийдвэрээс хамааруулан хүлээж буйгаа мэдэгдлээ.

Түүний хэлснээр, хурдны замын төсөл гацсан байдалтай байгаа. Хууль хүчний байгууллагаас хяналт шалгалт явуулж, 3 этгээдийг татаж, эрүүгийн хэрэг үүсгээд байгаа талаар Нийслэлийн удирдлага мэдээлэл авсан гэв.

Б.Пүрэвдагва нийслэлийн байр суурийг тайлбарлахдаа, төсөвт 500 тэрбум төгрөг суулгаж шилжүүлчихсэн учир үүнийг үр ашигтай зам болгох санал баримталж байсныг онцолсон. Харин Туулын трассыг иргэд илт эсэргүүцсэн бөгөөд ай сав, ундны усны эх үүсвэрийг хамгаалах шаардлага тавьсан. Үүнтэй холбоотойгоор нийслэл дараах хувилбаруудыг дэвшүүлж байгаа аж. Тодруулбал, олон түвшний уулзвар, холбоос замууд, торлог зам хийх; баруун гарцыг хийх зэрэг багтаж байна.

Гэвч хуулийн байгууллага шалгах процесс явагдаж байгаа тул одоогоор хүлээлтийн байдалтай байгаа аж. Нөхцөл байдлыг эргэн харахад хүнд асуудлууд харагдаж байгаа ч хуулийн байгууллага тодорхойлолт, дүгнэлтээ гаргана гэж найдаж буйгаа хотын дарга илэрхийлэв.

Гэрээний заалтын дагуу 78 орчим тэрбум төгрөгийн алданги бодогдох нөхцөл үүссэн байна. Харин одоогоор Нийслэлийн данснаас алданги хасагдаагүй гэж хотын дарга мэдэгдэв. Гэрээ асуудалтай байвал арбитраас айх зүйлгүй гэсэн байр суурьтай байгаагаа тэрээр илэрхийлж, хууль шүүхийн байгууллага процессыг сайтар тодруулж, түүний дараа цаашид алхахаас өөр аргагүй нөхцөлд байгааг хэллээ.

 Эх сурвалж: polit.mn