Т.БАТСАЙХАН
Засгийн газар яаралтай горимоор Гадаад зээллэгийн ашиглалт, үр ашгийг нэмэгдүүлэх тухай хуульд нэмэлт өөрчлөлт оруулах хуулийн төслийг дахин өргөн барихаар болжээ. Энэ хүрээнд гадаадын зээлээр хэрэгжиж байгаа гурван төслийн санхүүжилтийг өрийн хязгаарт баригдахгүйгээр зохицуулахаар төлөвлөж байгаа юм. Өнгөрсөн долоо хоногт УИХ-ын чуулганы нэгдсэн хуралдаанаар уг төслийг хэлэлцсэн ч дийлэнх олонх нь дэмжээгүйгээс төсөл унасан. Тэгвэл Засгийн газрын өчигдрийн хуралдаанаар Нийслэл Улаанбаатар хотод хэрэгжүүлж байгаа Сэлбэ дэд төв төслийн санхүүжилтийн асуудлыг уг хуулийн төслөөс хасаж, Эрдэнэбүрэнгийн усан цахилгаан станц, Газрын тос боловсруулах үйлдвэрийн зээлийн ашиглалттай холбоотой асуудлыг тусгасан байдлаар төслийг яаралтай горимоор өргөн барьж, хэлэлцүүлэхээр шийдвэрлэсэн байна. Хэрэв эдгээр төслийн зээлийн ашиглалтын асуудлыг яаралтай шийдэхгүй бол уг төслүүд санхүүжилтийн асуудлаас болж бүтээн байгуулалт зогсох, удаашрах бодитой эрсдэл үүснэ гэж албаныхан үзэж байгаа юм. Нэгэнт эхлүүлсэн төслүүд учраас 2026 онд шаардлагатай санхүүжилтийн өрийн хязгаарт баригдахгүй шийдэх ёстой гэж бодлого тодорхойлогчид тайлбарлаж байна. Сэлбэ дэд төв төслийн хувьд эхний ээлжийн 8000 гаруй орон сууцууд баригдаж дуусах шат руу орж байгаа бөгөөд зээлийн ашиглалтын эрхийг нь хуулиар олгохгүй бол санхүүжилт гацах, саатна. Үүнийг дагаад төсөл тэр чигтээ зогсох эрсдэлтэй нүүр тулж байна. Нөгөө талд эрх баригчид дотроо толхилцоонтой, Нийслэлийн Засаг дарга Х.Нямбаатарыг явуулахын тулд Сэлбэ дэд төвийн төслийг санхүүжилтээр нь гацааж байгаа хандлага ажиглагдаж байгаа нь нууц биш.
1.Газрын тос боловсруулах үйлдвэр Энэтхэгийн Засгийн газрын 1 тэрбум ам.долларын хөнгөлөлттэй зээлээр
2.Эрдэнэбүрэнгийн усан цахилгаан станц төсөл нь Хятадын Засгийн газрын 1 тэрбум ам.долларын хөнгөлөлттэй зээлээр
3.Сэлбэ дэд төвийн эхний ээлжинд 500 сая ам.долларын гадаад бондын санхүүжилтээр хэрэгжиж байгаа билээ.
Ц.Идэрбат: Махны үнийн өсөлтөд экспорт нөлөөлж байна гэж дүгнэхэд хэцүү
ХХААХҮ-ийн сайд Ц.Идэрбат махны үнийн өсөлтийн талаараа тайлбар өглөө. Тэрээр “2026 оны тавдугаар сарын 11-ний байдлаар 2100 тонн мах экспортолсон байна. Үүний 870 тонн нь адууны, 1100 тонн өнгөрсөн намар дулааны аргаар боловсруулж бэлдсэн үхрийн мах байна. Узбекистан улс руу 40 тонн хонины мах экспортолсон гэх мэдээллийг ГЕГ-аас өгсөн. Тэгэхээр махны үнийн өсөлтөд экспорт нөлөөлж байна гэж дүгнэхэд хэцүү. Хаврын махны үнийн өсөлт жил бүр улаанбаатарчууд, төв суурин газрынхны гол асуудал болж, энэ нь инфляцид хүчтэй нөлөөлдөг болоод байна. Тиймээс нийслэл, аймаг, суурин газрн удирдлагууд иргэдийнхээ махны хэрэглээг хангах чиглэлд дэвшил гаргаж ажиллах ёстой.
Нийслэлийн хувьд энэ жил 5000 тонн мах нөөцөлсөн бол ирэх жил үүнээс ахиулж бэлдэх яриаг одооноос хийж байна” гэлээ.
Эх сурвалж: “Зууны мэдээ” сонин
2026 ОНЫ ТАВДУГААР САРЫН 14. ПҮРЭВ ГАРАГ. № 92 (7834)
Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.
Үнэн мэдээллийг хамтдаа хамгаалцгаая.
Бие даасан сэтгүүл зүйг дэмжин "Зууны мэдээ" захиалаарай. www.zuuniimedee.mn
