Гадаад харилцааны сайд Б.Батцэцэг саяхан сэтгүүлч Б.Энхцэцэгт дэлгэрэнгүй ярилцлага өгсөн байна. Улс орны үндэсний аюулгүй байдлаас эхлээд олон асуултад сайд хариулт өгчээ. Тухайлбал, Б.Батцэцэг сайд өнөөдөр түүний харьяалагддаг намд үүсээд байгаа нөхцөл байдлын тухай ярихдаа “Нам амьд байгаа бол сэтгэлгээний өөрчлөлт хөдөлгөөн зайлшгүй шүү дээ. Үзэл санааны зөрөлдөөн байж болно. Амьд, хөдөлгөөнтэй нийгэмд шинэ, хуучин хоёр заавал зөрчилдөнө. Тэгэхээр энэ бол бэрхшээл биш. Харин зөрчил ямар шинж чанартай, ямар зорилгын төлөө байна вэ, эцэстээ улс орноо хаашаа авч явах вэ гэдэгт л гол асуудал бий. Миний бодлоор гол аюул нь улс төрийн маргаан улс орны эрх ашгаас давж, намын дотоод зөрчил төрийн жинхэнэ зорилгыг бүдгэрүүлж эхлэх тэр мөч. Нам бол хэрэгсэл болохоос зорилго биш шүү дээ. Төр ч аль нэг нам, бүлэглэлийн өмч биш. Эрх мэдэл наймаалцдаг зүйл биш. Хэрэв бид энэ энгийн үнэнийг мартвал өнөөгийн энэ байдал аюулын шинжтэй болно.
Сүүлийн жилүүдэд би нэг зүйлд улам бат итгэх болсон. Улс орныг гадны аюул тэр болгон сүйрүүлдэггүй юм байна. Харин ард түмний төрдөө итгэх итгэл алдагдахад улс дотроосоо хэврэг болдог юм байна. Итгэлцэл алдагдах нь эдийн засгийн хүндрэл, гадаад дарамт, улс төрийн өрсөлдөөнөөс ч илүү ноцтой. Яагаад гэвэл төрийн жинхэнэ хүч нь захирах, эрхшээх хүчинд бус, иргэддээ “энэ төр биднийх, бидний төлөө байдаг, алдаа гаргасан ч засах чадвартай” гэсэн дотоод итгэл төрүүлж чаддагт оршдог. Өнөөдөр манай намд ч, ер нь Монголын улс төрд өрнөж байгаа үзэгдлийг би зүгээр нэг удирдлагын, зохион байгуулалтын доголдол, эсвэл фракцын зөрчил биш ёс суртахууны сорилт гэж бодож байна. Бид төрийг юу гэж ойлгодог вэ? Албан тушаалыг юу гэж үзэж байна вэ? Олон нийтийн итгэлийг юугаар хэмжих вэ? Бидний улс төрийн тэмцэл улс орныг хүчтэй болгож байна уу, эсвэл ард түмний итгэлийг сулруулж байна уу? Энэ асуулт бүрийн цаана Монголын ирээдүйтэй холбоотой хариуцлага бий” гэсэн байна.
Ярилцлагын дэлгэрэнгүйг:Duuren.Life - Гадаад харилцааны сайд Б.Батцэцэг: Үндэсний эрх ашгийг заримдаа дуугарч, заримдаа дуугүй байж хамгаалдаг
