Т.САЙХАН

Нийслэлийн прокурорын газраас “Эрдэнэс критикал минералс” ТӨҮГ-ын гүйцэтгэх захирал Д.Тогтохсүрэнг “Эрх мэдэл, албан тушаалын байдлаа урвуулан ашиглах”, “Нийтийн албан тушаалтан хахууль авах”, “Үндэслэлгүйгээр хөрөнгөжих” гэмт хэрэгт холбогдуулан эрүүгийн хэрэг үүсгэж яллагдагчаар татсан. Улмаар шүүхээс түүнд цагдан хорих таслан сэргийлэх арга хэмжээ аваад байв.

Тэгвэл Д.Тогтохсүрэнгийн өмгөөлөгчийн зүгээс цагдан хорих таслан сэргийлэх арга хэмжээг өөрчлүүлэх тухай хүсэлтийг Дүүргийн Эрүү, Иргэний хэргийн хялбар ажиллагааны анхан шатны шүүхэд ирүүлснийг шүүх хянан хэлэлцээд хүсэлтийг хүлээн авахаас татгалзаж шийдвэрлэжээ.

Гэвч шүүгчийн энэхүү захирамжийг яллагдагчийн өмгөөлөгч Б.Б нь эс зөвшөөрч Ерөнхий шүүгчид гомдол гаргасныг 2026 оны хоёрдугаар сарын 16-ны өдөр хянан хэлэлцэв. Улмаар хэрэгт авагдсан баримт, яллагдагчийн эрүүл мэндийн байдлыг харгалзан Д.Тогтохсүрэнд авсан цагдан хорих таслан сэргийлэх арга хэмжээг өөрчилж, прокурорын саналыг үндэслэн яллагдагчид Монгол Улсын хилээр гарахыг хязгаарлах, тус хэргийн оролцогч, бусад оролцогчидтой уулзах, харилцах, харилцаа холбоо тогтоохыг хориглох хязгаарлалт тогтоох таслан сэргийлэх арга хэмжээ авч шийдвэрлэсэн байна.

Д.Тогтохсүрэн нь УИХ-ын гишүүн, УИХ дахь МАН-ын бүлгийн даргаар ажиллаж байгаад 2024 оны намар хуучнаар “Монголросцветмет” буюу одоогийн “Эрдэнэс критикал минералс” ТӨҮГ-ын гүйцэтгэх захирлаар томилон ажиллаж байгаа юм.

Эх сурвалж:www.polit.mn