Монгол Улс Авлигатай тэмцээд л байна гэх атлаа авлигын индеск нь уруудаад л байдаг. 2025 оны үзүүлэлтээр арваад байр ухарчихсан нь олон нийтийг бухимдуулж ихээхэн шүүмжлэл дагуулж байгаа билээ. Улаанбаатар хотын газар, түүгээр дамжуулан хийж байгаа мөнгө угаалт гэдэг хамгийн том хар толбо болсоор ирсэн. Газрын наймааны асуудлаа цэгцэлж чадаагүй явсаар байтал олон улсад мөнгө угаалтад ашиглагддаг хамгийн сонгодог жишээ болдог барилгын асуудал нэмэгдсэн. Хэвлэлүүд ч их бичдэг дээ. Тухайлбал, News.mn сайт “Авлига үнэртсэн барилгууд” тойм нийтлэлдээ төв шуудангийн урд талбайд баригдах 54 давхар бүхий оффисын зориулалттай барилгын асуудлыг хөндөж бичихдээ “...Хот байгуулалт, хөгжлийн газарт барилгажилтын төсөл хийсэн” гэдгийг тэмдэглэжээ. Товчдоо бол, Хот төлөвлөлт буруу муу байна гэдэг атлаа хотын хариуцсан газар нь хотын төв түгжрэлийн цэгээ улам бүр нэмэх төсөл хийжээ. Хотын төвд дахин газар олгохгүй, дахин өндөр байшин барьж түгжрэл нэмэхгүй гэж наанаа ярьдаг дарга нарыг үг цаанаа тэс өөр байдгийн жишээ нь энэхүү 54 давхар барилга гэж хэлж болно. Сүүлийн үед “Улаанбаатар хотын төв цэгээс 800-хан метрийн зайтай тансаг хороолол”-ын тухай реклам сошиалд завсар чөлөөгүй цацагдаж байна. Хотын төвд хаанаас ийм газар байгаад хэн тансаг хороолол бариад эхлэв гэдэг нь анхаарал татна. Гэтэл өнгөрсөн жилийн хавар Улаанбаатар хотын захирагч Х.Нямбаатарын лайв-д өртсөн газар дээр босож байгаа аж. Хотын дарга энд тэнд очиж лайвдаад байшин барилга нураагаад байсан цувралын нэг хэсэг гэсэн үг. Ингэж лайвдаж нураасан болгон хотын даргын зөв байсан уу гэдэг том асуулт шүү. Хэвлэлээр ил гарч байсан мэдээллүүдээс шүүж үзэхэд “Улаанбаатар хотын төв цэгээс 800-хан метрийн зайтай тансаг хороолол” нь Уламжлалт анагаах ухааны эмийн үйлдвэрийн барилга байсан газар ба хотын даргын лайв-ын дараа нурааж байгаад газрыг нь дуудлага худалдаагаар зарсан байна. Ярьж байгаа зүйл нь бодит байдалтайгаа зөрдөг учраас иргэд олон нийт шүүмжилж, бас цаана нь ямар эрх ашиг байна гэж хардах нь зүй билээ. Төв шуудангийн урдахь 54 давхар, “Улаанбаатар хотын төв цэгээс 800-хан метрийн зайтай тансаг хороолол” ... мөнгө угаалт биш биз гэдэг асуулт гарч ирж байгаа юм. Хариулах газар нь угтаа бол АТГ. Авлигын индескийг ухрааж тоолоод сууж байдаг АТГ-д хийх ажил их байна даа.
Эх сурвалж:www.polit.mn
