Т.САЙХАН

Нийгмийн эрүүл мэндийн үндэсний төвийн захирал Л.Баттөр угаарын улмаас эрүүл мэнд, амь насаараа хохирсон иргэдийн талаарх тоо, мэдээллийг хүргэлээ. Тэрээр " Нийгмийн эрүүл мэндийн үндэсний төв орчны эрүүл  мэндийн тандалт судалгаа болон угаараас улбаатай хор хохирлын тандалтыг мөн хийдэг.  2023-2025 оны тоон мэдээллийг хүргэхэд, 2023 онд 3184 хүн,  2024 онд 2830 хүн, 2025 онд 2267 хүн тус тус угаартжээ.  Харин нас баралтын тухайд, 2023 онд 61 иргэн, 2024 онд 53, 2025 онд 30 иргэн нас баржээ. Нөлөөлж буй хүчин зүйлийг нь сайн судлах шаардлагатай. Мөн үүний цаад учир шалтгааныг тодорхой болгох, цаашид хэрхэн урьдчилан сэргийлэх нь чухал" гэв.   Харин  Үндэсний хорооны Ажлын албаны дарга С.Даваасүрэн "Коксон түлш хэрэглээд багагүй хугацаа өнгөрлөө. Өнгөрсөн 12 дугаар сард нийслэлийн иргэдийн тал хувь нь хагас коксон түлш хэрэглэсэн. Нэгдүгээр сард бүх өрх хагас коксон түлш хэрэглэсэн. Өнгөрсөн 12 дугаар сарыг өмнөх оны мөн үетэй харьцуулж үзэхэд агаарын бохирдол 23 хувиар буурсан байна. Харин нэгдүгээр сард 26 хувиар буурсан гэх дүн гарсан. Автомашины утааны эсрэг тодорхой ажил хийгдээгүй.Лабораторийн шинжилгээгээр хагас коксон түлшийг өмнөх сайжруулсан түлштэй харьцуулахад үнслэг 10.2 хувь, хүхэр 46 хувиар буурсан байна. Манай лабораторийн шинжилгээний дүн бол бодитой юм" гэлээ. 

Эх сурвалж:www.polit.mn