Т.БАТСАЙХАН
Дээд шүүх АН-ын даргаар О.Цогтгэрэлийг батламжилсан ч тэрээр нам дотроо хүлээн зөвшөөрөгдсөн эсэх нь тун бүрхэг байна. Уг нь одоо О.Цогтгэрэл сөрөг хүчний даргын хувьд естой л асуудал бүхэн дээр “асаж” намын гишүүдээ өөрийн гараар хөдөлгөж өөрчлөлт шинэчлэлүүдийг зурж байх учиртай. Үе үеийн АН-ын дарга нар ч тийм л эрч хүчтэй алхмуудыг хийж тэр хэрээрээ ад үзэгдэж нөгөө талдаа хүлээн зөвшөөрөгдөж байв. Гэвч О.Цогтгэрэл анхнаасаа л намынхандаа гологдоод эхлэв бололтой. Намын даргаар батламжлагдсаныхаа дараа хийсэн мэдэгдэл нь тун ч аядуу тайван байв. Намын гишүүдээ хамтарч ажиллая л гээд байгаа бололтой. Гэхдээ АН шиг адармаатай, олон салаа мөчиртэй намыг аядуу зөөлөн О.Цогтгэрэлийн зан арга барил хэр зангидаж чадах юм бол. Тэдэнд Н.Алтанхуяг, С.Эрдэнэ нарын өмнөх найман даргынх нь харизм, улс төрийн зориг үгүйлэгдэх нь тодорхой л доо. Мөн О.Цогтгэрэлийн хийж байгаа томилгоонуудад намын гишүүд нь тийм ч таатай биш байх болсон. АН-ын Ерөнхий нарийн бичгийн дарга Н.Ганибалыг үүрэгт ажлаас нь чөлөөлж, Д.Амарбаясгаланг үүрэг гүйцэтгэгчээр томилсон. Д.Амарбаясгалан АН-ын гишүүнээр олон жил “ажилласан” байж болох улс төрд ялангуяа АН тун чиг сул хувилбар байлаа. Түүний дараа АН-ын дарга О.Цогтгэрэл “Гэрэгэ бодлогын хүрээлэн”-г үүсгэн байгуулж буйгаа зарласан. “Гэрэгэ бодлогын хүрээлэн”Удирдах зөвлөлийн есөн гишүүнтэй байх бөгөөд АН-ын хуучин дарга Л.Гантөмөр, З.Нарантуяа, Ерөнхий сайд асан Р.Амаржаргал, УИХ-ын гишүүн Б.Жаргалан нарыг багтаажээ. Харин гүйцэтгэх захирлын албан тушаалд Х.Номингэрэлийг томилохоор шийдвэрлэжээ. Х.Номингэрэл нь улс төрд Х.Тэмүүжингийн хүн хэмээгддэг. Өнгөрсөн сонгуульд АН-ын жагсаалтад багтаж байсан нэгэн. Энэхүү томилгоонуудаас харахад АН-д өөрчлөлт шинэчлэлт ирнэ гэж найдах хэрэггүй болжээ гэж гишүүд нь эхнээсээ халаглаад эхэлсэн байна билээ. Ямартай ч ирэх гуравдугаар сарын 10-наас дөрөвдүгээр сарын 1-ний хооронд АН дотоод сонгуулиудыг зохион байгуулж, дөрөвдүгээр сарын 07, 08-нд Ардчилсан Намын Их хурлыг хуралдуулж, шинэчилсэн бүтцийг батламжилна. Улмаар 2027 оны Ерөнхийлөгчийн сонгуульд төвлөрч ажиллана гэсэн. Гэхдээ аядуу тайван АН-ын дарга О.Цогтгэрэл тэр болтол тэсэх үү гэдэг нь анхаарал татаж байна.
Эх сурвалж: “Зууны мэдээ” сонин
2026 ОНЫ НЭГДҮГЭЭР САРЫН 23. БААСАН ГАРАГ. № 15 (7757)
Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.
Үнэн мэдээллийг хамтдаа хамгаалцгаая.
Бие даасан сэтгүүл зүйг дэмжин "Зууны мэдээ" захиалаарай. www.zuuniimedee.mn
