Б.НАНДИН

БНСУ-д монгол хэлээр уншигчдад хүрэх нэгэн цоо шинэ сэтгүүл мэндэлжээ. Монгол хэл дээр солонгос хэв маягийг олон нийтэд таниулсан “Awezome” нэртэй сэтгүүлийг солонгос, монгол залуусын баг хамтран гаргаж анхны дугаараа уншигчдадаа өргөн барьжээ. 
Манай улсаас 220 гаруй мянган монгол хүн гадаад улс орнуудад сурч, ажиллаж амьдарч байна. Тэдний хамгийн олон нь БНСУ-д амьдардаг. Тэр ч утгаараа солонгос соёл, амьдралын хэв маяг болон Солонгос дахь монголчуудад найдвартай, тэнцвэртэй хамгийн гол нь хэрэгтэй мэдээлэл хүргэх зорилготой аж. Мөн сэтгүүлийг бэлтгэхдээ Солонгост ажиллаж амьдарч буй монголчуудын бодит амьдралын туршлага дээр үндэслэн хүргэж байгаа учир хамгийн гол хэрэгцээтэй мэдээллүүд болох визний систем, сургууль, тэтгэлгийн мэдээлэл, дотуур байрны амьдрал, цагийн ажил, хоолны соёл, Солонгосын нийгмийн сэтгэлгээ, соёл, зайлшгүй шаардлагатай урьдчилан сэргийлэх арга хэмжээ зэрэг олон төрлийн мэдээллийг багтаахаар зорьж байгаа гэнэ. 
Сэтгүүлийн багийнхан "Солонгост айлчилж буй монголчууд өөр өөр зорилготой боловч нийтлэг хэрэгцээтэй байдаг. Бид өөрсдийн туршлага дээр үндэслэн практик гарын авлага бүтээхийг зорьсон" гэж ярьжээ. Өөрөөр хэлбэл, "Awezome" нь Солонгост ирэхээр бэлдэж буй эсвэл аль хэдийн суурьшсан Монголчуудад зориулсан гарын авлага болж, хоёр орны залуучуудын хоорондын солилцоо, ойлголцлыг дэмжих харилцааны суваг болох боломжтой юм. "Awezome" сэтгүүлийг улирал тутамд гаргах бөгөөд Сөүл хотод бол Монголын Элчин сайдын яамны байр, Монголын Хөдөлмөр, Нийгмийн Хамгааллын Үйлчилгээний Агентлаг, Монгол таун, Монгол хэл, соёлын төвөөс авах боломжтой. Мөн Илсан дүүргийн Наму төв, Чонжү дэх Монголын хөгжлийн төвөөс худалдан авч уншаарай.

Эх сурвалж: "Зууны мэдээ" сонин

2026 ОНЫ НЭГДҮГЭЭР САРЫН 9. БААСАН ГАРАГ. № 5 (7747)