Т.САЙХАН

Г.Занданшатарын Засгийн газрын нэн тэргүүнд шийдэх асуудлын нэг бол шатахууны нийлүүлэлт .  Сүүлийн үед манай улсад байс гээд л шатахууны хомсдол үүсэж, олон нийтийг бухимдуулах болов.  Өнөөдөр нийлүүлэлт хэвийн болсон гэж байгаа ч дараагийн нэг өдөр дахиад асуудал үүсэхийг үгүйсгэх аргагүй.  Яагаад гэвэл Монгол Улс шатахуунаа 100 хувь экспортлодог орон.   Хөрш хоёр оронтой л учраа олж байж энэ асуудал хэвийн тасралтгүй үргэлжилнэ гэсэн үг. Түүнээс биш зөвхөн хэн нэгэн сайд, даргаас шатахуун нийлүүлэлт шалтгаалахгүй болов уу.

Аж үйлдвэр, эрдэс баялгийн сайд Г.Дамдинням ажлаа аваад л шатахууны нийлүүлэлтийн асуудалтай нүүр тулсан гэхэд болно.  Шатахууны хомсдол үүсэх болгонд түүний сайдын суудал ганхаж байсан.  Ямартай ч салбарын сайдын хувьд шалтгаан нөхцөлийг тодорхойлж, авах арга хэмжээнүүдийг авснаар нийлүүлэлт нэг хэсэгтээ хэвийн болсон. Мөн шатахууны нөөц бэлдэх “сав”  авах тухай хуулийн төслийг санаачлан УИХ-аар батлуулсан юм.

Тэгвэл саваа бэлдсэн сайд саалиа бэлдэхээр урд хөршийг өчигдөр зорьжээ.  Аж үйлдвэр эрдэс баялгийн сайд Г.Дамдинням БНХАУ-д хийж буй ажлын айлчлалынхаа хүрээнд БНХАУ-ын Үндэсний хөгжил шинэчлэлийн хорооны дэд дарга болон Байгалийн баялгийн яамны сайд Гуань Жи Өү-тэй албан уулзалт хийхээр төлөвлөсөн байна.  Өнгөрсөн оны аравдугаар сард тэрээр БНХАУ-ын Монгол Улсад суугаа Онц бөгөөд Бүрэн эрхт Элчин сайд Шэнь Миньжуаньтай хийсэн уулзалтын үеэр шатахууны нийлүүлэлтийг хоёр дахин нэмэгдүүлэх, тээвэрлэлтийг шуурхай зохион байгуулах чиглэлээр тохиролцоонд хүрсэн билээ. Тэгэхээр энэ удаагийнхаа  айлчлалын хүрээнд газрын тосны бүтээгдэхүүний нийлүүлэлтийг нэмэгдүүлэх, газрын тосны хайгуул олборлолтыг өргөжүүлэх зэрэг асуудлаар БНХАУ-ын холбогдох албаны төлөөлөгчидтэй дэлгэрэнгүй хэлэлцээ хийж, өмнө нь ярьж тохирсон зүйлээ ажил хэрэг болгохоор төлөвлөсөн байна.

Эх сурвалж:www.polit.mn