Т.САЙХАН

Засгийн газрын 2025 оны нэгдүгээр сарын 29-ний хуралдааны тогтоолд өвөл, хаврын улиралд зохион байгуулагдаж буй хурдан морины уралдаанд 18-с доош насны хүүхдийг оролцуулахгүй байх шийдвэр батлагдсан юм. Тухайлбал, өнгөрөгч 2024 онд 11 мянга гаруй унаач хүүхэд бүртгэгдсэнээс 1000 гаруй нь өөрийнхөө морь, үлдсэн нь гэрээгээр эсвэл тохиролцож өвөл, хаврын морин уралдаанд морь унасан байжээ.

Түүнчлэн, Гэр бүл, хүүхэд хөгжил хамгааллын газар, аймаг, нийслэлийн засаг дарга нар руу хурдан морины унаач хүүхэд хагас, бүтэн өнчин эсэх, үрчлэгдсэн, эрсдэлт бүлэгт хамаардаг эсэх гэх мэт бүртгэлийг дэлгэрэнгүй хийх зөвлөмжийг хүргүүлсэн байдаг. Хэрэв өвөл, хавар хүүхдийг морины ажил, сунгаа, бэлтгэлийн үед оролцуулбал зөрчлийн арга хэмжээ авч ажиллах зохицуулалт үйлчилнэ.

Уралдаанч хүүхэд бүрт бүтэн жилийн хугацаатай, 100,000 төгрөгийн хураамжтай, 20 сая төгрөгийн нөхөн төлбөр олгох даатгалыг заавал хийлгэх ёстой.  Мөн хурдан морины уралдаанд хүүхдийг оролцуулахдаа эцэг эх, уяач, хүүхдийн хооронд гуравласан гэрээ заавал байгуулах шаардлагатай юм.

Өнгөрсөн 29 жилийн хугацаанд 52 унаач хүүхэд амь насаа алдсан нь зөвхөн бүртгэгдсэн тоо юм. Бүртгэгдээгүй тохиолдлууд байхыг үгүйсгэхгүй гэдгийг Гэр бүл хүүхэд хамгааллын ерөнхий газраас анхааруулжээ. 

Эх сурвалж:www.polit.mn