Т.САЙХАН

Хууль зүй, дотоод хэргийн сайдын тушаалаар “Эмнэлгийн чанартай албадлагын арга хэмжээ авах эрх зүйн зохицуулалтыг боловсронгуй болгох чиглэлээр Эрүүгийн хуульд нэмэлт, өөрчлөлт оруулах тухай хуулийн төслийг боловсруулах” үүрэг бүхий ажлын хэсэг байгуулсан. Тус ажлын хэсгийн анхны хуралдаан болж Эрүүгийн хууль, Эрүүгийн хэрэг хянан шийдвэрлэх тухай хууль, Зөрчил шалган шийдвэрлэх тухай хууль болон бусад хууль тогтоомжид заасан эмнэлгийн чанартай албадлагын арга хэмжээ хэрэглэх үндэслэл, журмыг боловсронгуй болгох, хяналт, хариуцлагыг нэмэгдүүлэх, ялын бодлогыг чангатгах, олон улсын сайн жишигт нийцүүлэх чиглэлээр шуурхай ажиллахаар болжээ.  Түүнчлэн нийгэмд хор хохирол учруулсан үйлдлээ хянах чадваргүй, хэрэг үйлдэгч этгээдэд үргэлжлүүлэн үзүүлэх эмнэлгийн тусламж, үйлчилгээний сайн туршлагыг нэвтрүүлэх талаар уг ажлын хэсэг санал боловсруулах юм.

    Мөн дээрх хууль тогтоомжуудын хүрээнд эмнэлгийн чанартай албадлагын арга хэмжээний үр дагаврын судалгаа, эрх зүйн зохицуулалтыг боловсронгуй болгох хэрэгцээ, шаардлагын тандан судалгаа, энэ төрлийн албадлагын арга хэмжээ авагдсан болон эмчилгээг зогсоосон этгээдэд тавих хяналтыг чангатгах тал дээр анхаарч ажиллахыг Хууль зүй, дотоод хэргийн дэд сайд Д.Мөнх-Эрдэнэ холбогдох албан тушаалтнуудад үүрэг болголоо. 

Хуралдаанаар Aжлын хэсгийн төлөвлөгөөг баталсан бөгөөд Эрүүгийн хуульд нэмэлт, өөрчлөлт оруулах болон холбогдох бусад хуулийн төслийг 2025 оны 02 дугаар сард багтаан боловсруулж, Засгийн газрын хуралдаанаар хэлэлцүүлэн, Улсын Их Хуралд өргөн мэдүүлнэ. 

Эрүүгийн хуулийн 7.4т заасны дагуу гэмт хэрэг үйлдэх үедээ хэрэг хариуцах чадваргүй байсан буюу үйлдсэн гэмт хэргийн нийгмийн аюул, хор уршгийг ухамсарлах чадваргүй хүмүүсийг хатуу хяналтад байлгах “Тусгай төв” манай улсад зайлшгүй шаардалагатай гэж Хууль зүй, дотоод хэргийн сайд үзсэний дагуу тус төвийг даруй байгуулах ажлыг эрчимжүүлэн ажиллахаар болоод байна. Монгол Улсын хэмжээнд эмнэлгийн чанартай албагдлагын арга хэмжээ авагдсан 257 хүн байгаагаас жилд дунджаар 30 орчим хүнд эмнэлгийн чанартай албадлагын арга хэмжээ авагддаг гэсэн судалгаа байгаа юм.

Эх сурвалж:www.polit.mn