Т.САЙХАН

Шатахууны хомсдолын асуудлаар АҮЭБ-ийн дэд сайд Б.Энхтүвшин өнөөдөр мэдээлэл хийлээ.  Тэрээр "Бид нефть импортлогч компаниудтай нягт холбоотой ажиллаж байгаа. ОХУ-аас өдөрт 40 вагон АИ92 автобензин улсын хилээр оруулж ирж чадвал өдрийн хэрэгцээг бүрэн дүүрэн хангаад явна.  Сүүлийн өдрүүдэд ОХУ, Монголын Засгийн газар хоорондын хэлэлцээрийн дагуу нөхцөл байдал, зовлон жаргалаа ярьж байж нийлүүлэлтээ нэмэх хүсэлт өгсөн. ОХУ-ын Ерөнхийлөгч манай улсыг ямар ч тохиолдолд нефтиэр тасралтгүй хангана гэж үргэлж хэлдэг. Гэхдээ бид тус улсын дотоод үйл хэрэгт оролцож чадахгүй. Мөн шатахуун нийлүүлэгч үйлдвэр ачааллаа дийлэхгүй байгаа бололтой. Тиймээс 3, 13 гэх байдлаар нийлүүлж байна. Харин сүүлийн 3 хоногт 63, 65, 54, өнөөдөр 50 гаруй вагон шатахуун орж ирсэн гэх мэдээлэлтэй байгаа. Яамны ажилтнууд оройн цагаар Улаанбаатар хотод үйл ажиллагаа явуулж байгаа шатахуун борлуулагч ААН-үүдэд шалгалт хийлээ. Байгаа шатахуунаа борлуулж байна уу, нөөцөд үлдээгээд байна уу гэдгийг шалгасан. Сайд өчигдөр өөрийн биеэр шалгалаа. Үүгээр цөөнгүй зөрчил, дутагдал илэрлээ. Зарим нь хаалгаа түгжээд унтчихсан байх жишээтэй. Зарим түгээгч нар ядраад байна гээд хаалгаа онгойлгохгүй байх, бага хэмжээний нөөцтэй хэр нь түүнийгээ борлуулахгүй байх зэрэг  нийтлэг зөрчил илэрсэн. Мөн өнөө өглөө шатахуун түгээх станцын ажилтны биед халдсан нөхцөл тогтоогдлоо. Хэвлэл мэдээллийн хэрэгслээр савтай 15 литр шатахууныг 170 мянган төгрөгөөр худалдан шаглах асуудлыг сурвалжилжээ. Үүнд шуурхай арга хэмжээ авч Цагдаагийн байгууллагад мэдээллийг хүргүүлсэн. БНХАУ-ын Элчин сайдын яамнаас манай сайдад өчигдөр албан бичиг ирүүлсэн. Тус албан бичигт “Танай улсын олон төлөөлөл манай нефть экспортод гаргадаг хүмүүст санал тавиад, самраад байна. Нэгдсэн нэг бодлого алга. Та бүхэн нэг цонхны бодлогоор хүсэлтээ өгөөч. Энэ тохиолдолд бид та нартай харьцаж чадна. Үгүй бол, 1.5 вагон шатахуун өгөөч гэх асуудлыг бид хүлээн авахгүй гэсэн. Сайд шуурхай хуралдаж, чиглэл өгсөн. БНХАУ-аас энгийн АИ92 шатахуун авах боломжгүй, учир нь тэнд байхгүй. ОХУ-аас энэ шатахууныг Киргизстан, манай улс хоёр л энэ шатахууныг хэрэглэж байгаа гэх мэдээлэлтэй байна. Киргизстан дараа жилээс авахаа болих талаар сонссон, ингээд зөвхөн манай улс л үлдэх нь. Евро-5 нь тонн тутамдаа 860-890 ам.доллароор орж ирж байгаа. Энгийн буюу Ангарскийн үйлдвэрээс ирж байгаа нь 705 ам.доллар Зөрүү бий учраас тэр үнээрээ зарахгүй бол аж ахуйн нэгж алдагдал хүлээнэ. Он дуустал энгийн АИ-92, Евро-5, АИ-95, дизель түлш дээр үнэ нэмэгдэхгүй. Оны дараа экспортлогч улсууд ямар нөхцөл тавихыг мэдэхгүй. Одоогоор боломжит хамгийн бага үнээр авах хүсэлтээ өгсөн. Маргааш ОХУ-ын холбогдох яамдын удирдлагуудтай цахим уулзалт хийхдээ үнэ, нийлүүлэлтийн талаар ярилцана" гэлээ. 

Эх сурвалж:www.polit.mn