Т.САЙХАН
Цахим орчинд хугацаат цэргийн алба хаагчид нэгнийхээ биед халдаж байгаа талаарх дүрс бичлэг өчигдөр /12.23/ нийтлэгдсэн. Дүрс бичлэгтэй холбогдуулан Дотоодын цэргийн штабын Дотоод хяналт, аюулгүй байдлын хэлтсээс шалгалтын ажиллагааг холбогдох хууль, тогтоомжийн дагуу зохион байгуулж эхэлжээ.
Зодуулсан хүүгийн аав "Хүүг минь зодож байгааг интернэтээс бичлэг хараад үнэхээр цочирдлоо. Шууд Налайхаас гараад ирлээ. Алба хааж байгаа бусад цэргүүдийн эцэг, эх ч бас ирсэн. Би хүүгээ алгадаж ч үзээгүй. Гэтэл албаа сайн хаагаарай гээд явуулсан хүүг минь унатал цохиж, яргалж байгааг харах хүнд байлаа. Үхчихсэн байвал яах вэ. Тангаргийн баяраар нь ирэхэд нүднээс гартал турчихсан байсан, тэвчээд өнгөрсөн. Нулимсаа залгиад гарч байсан. Цэргийн ангид яргалал байсаар байгаад харамсаж байна" гэж нүүр номоороо дамжуулан мэдэгдээд байна.
Дотоодын 05-р ангийн захирагч, хурандаа Д.Манлайбаатар: - Миний хариуцан ажиллаж байгаа дотоодын цэргийн 05-р ангид энэхүү асуудал гарсан. Энэ төрлийн хэрэг гараагүй. Цаашид гарах ёсгүй гэж үздэг. Уг асуудлын хүрээнд холбогдох алба хаагчид шуурхай арга хэмжээ авч ажиллаж байгаа. Хугацаат цэргийн алба хаагч цэргийн дотоод дүрмээр нэг жилийн хугацаатай хаах үүрэгтэй. Уг хэрэгт холбогдсон хугацаат цэргийн алба хаагчид 2025 оны нэгдүгээр ээлжид төв болон орон нутгаас татагдсан. Надад өгсөн мэдээллээр, цэргийн биеийн байдал урьдчилсан байдлаар хэвийн буюу нарийн мэргэжлийн эмчид үзүүлэх шаардлагагүй гэж мэргэжлийн эмч нараас хариу өгсөн. Эрх бүхий албан байгууллагын хариу одоогоор эцэслэгдэн гараагүй байна. Хугацаат цэргийн алба хаагчдын дунд үүссэн маргаан нь дөрвөн алба хаагчдын дунд үүссэн. Дэд түрүүч болон түрүүч нарын дунд үүссэн хувийн харилцааны маргааны асуудал байсан тухай мэдэгдсэн.
Дотоодын цэргийн штабын дарга, бригадын генерал Р.Чингис: -Бид, та нарыг нэг зүйлийг ойлгоосой гэж хүсэж байна. Бид нар энэ хүмүүсийн зогсоож, барих зүйл байдаггүй. Гол нь бид нарын асуудал бол аль болох олон аавын хүүхдийг нэг жилийн хугацаат цэргийн албанд татахдаа эр хүн болгох, эх орны хүү болоосой гэж хүсдэг. Тиймээс бид нарын хүүхэдтэй адилхан учир энэхүү зовлонг мэддэг. Тиймээс дүрмийн бус харилцааг батлах хамгаалах, зэвсэгт хүчин, дотоодын цэрэг, хилийн цэрэгт огт зөвшөөрдөггүй. Үүнийг та нар ойлгох хэрэгтэй. Энэ асуудал хаана болсон талаар манай захирагч хэлсэн. Энэ хүрээнд бид бүхэн хэн бүхэнтэй хамтарч ажиллахыг хүсэж байна. Бид нарын хараагүй, мэдээгүй, камер байдаггүй газарт болсон. Бид нарын авсан мэдээллээр, хувь хүний хоорондын харилцаанаас болсон асуудал гэсэн. Хэн яаж зохисон, ямар бэртэл авсныг хууль шүүхийн байгууллагаас тогтооно. Би нарт нэг зүйлийг хэлмээр байна. Юу гэвэл, цэргийн байгууллага зовдог, зодуулдаг газар бол биш. Бид бүхэн хэвлэл мэдээллийн байгууллага, иргэдтэй хамтарч ажиллахыг хүсэж байна. Монгол Улсын ирээдүй болсон залуусыг улсынхаа тусгаар тогтнол, азтай эр хүн, мөн гэр бүлээ авч явах эр хүн болгож байгаа. Тэр утгаар нь дүрмийн бус харилцаа бүү гараасай гэдэг үүднээс дүрэм журмаар нь явж байгаа. Мөн бидний хараа хяналтаас гардаг хар бүс гэж цэргийн ангид байдаг. Тэрхүү хар бүсэд үйлдэгдсэн хэрэг байлаа. Энэхүү бичлэг хийсэн хүнд талархаж байна. Яагаад гэвэл бидэнд ийм мэдээлэл хэрэгтэй. Тиймээс хоёр талд гарч зогсохгүйгээр нэг талд гарч хамтарч ажиллаж сайжруулах хэрэгтэй. Бид бүхэнд та нарын дуу хоолой, зөвлөмж маш их хэрэгтэй. Хугацаат цэргийн алба хаагчид цэргийн албыг яаж авч явах уу гэдэг нь зөвхөн салбарын толгойны өвчин биш. Нийгэм, төр засаг, иргэдийн бодлогын асуудал юм. Хэрэв бичлэг хийгээгүй бол бид нар мэдэхгүй өнгөрөх байсан. Уг хэрэгт буруутай хүмүүст хатуу хариуцлага тооцно. Энэхүү асуудалд ХЗДХ-ийн сайд анхаарч ажиллаж байгаа. Мөн хүний эрхийн үндэсний комисстой нягт холбоотой ажиллана, тус комисс манай дээр ирээсэй.
Эх сурвалж:www.polit.mn
