Т.САЙХАН

АН-ын бүлэг  ээлжит хуралдаанаараа хоёр асуудлыг хэлэлцлээ. Эхний асуудлаар Төрийн албаны тухай хууль болон Төрийн захиргааны болон үйлчилгээний албан хаагчдад төрийн алба хаасан хугацааны нэмэгдэл олгох журмын хэрэгжилтийн талаар мэдээлэл сонсов. Тус танилцуулгыг Төрийн албаны зөвлөлийн дарга Л.Цэдэвсүрэн хийж, гишүүдийн асуултад хариулав.

Гишүүдийн зүгээс Төрийн албаны зөвлөл (ТАЗ) сүүлийн жилүүдэд нэг намын бүтцийн байгууллага мэт ажиллаж ирснийг онцолж, МАН-ын даргын албан бичгийг үндэслэн төрийн албан тушаалд томилгоо хийх нь хууль зөрчсөн үйлдэл болохыг хатуу сануулав. Мөн нийслэлийн 45 төлөөлөгчөөс 40 нь орон нутгийн өмчит компанид удирдах алба хашиж буй нь ашиг сонирхлын зөрчил үүсгэж, иргэдийнхээ эрх ашгийг хамгаалах дуу хоолойгоо чөлөөтэй гаргах боломжийг хааж байгааг шүүмжиллээ.

Түүнчлэн “Төрийн албаны тухай хууль” нэрийн дор тухайн байгууллага МАН-ын нөлөөнд ажиллаж ирсэн, гадаадад төгссөн шинэ үеийн боловсон хүчин, залуучуудад хаалттай, коммунист хэв маяг бүхий тогтолцоотой болсон гэдгийг бүлгийн гишүүд тэмдэглэв. Төрийн албаны зөвлөл нь төрийн боловсон хүчний бодлогыг хамгийн ихээр будилуулж буй газар гэдгийг онцлон, хууль биелүүлж ажиллах шаардлага тавилаа.

Хуралдааны хоёр дахь асуудлаар Монгол Улсын Засаг захиргаа, нутаг дэвсгэрийн нэгж, түүний удирдлагын тухай хууль болон Нийслэл Улаанбаатар хотын эрх зүйн байдлын тухай хуулийн хэрэгжилтийн байдал, эдгээрт өөрчлөлт оруулах шаардлагын талаар Ардчилсан намын бүлгээс байгуулсан ажлын хэсгийн мэдээллийг сонсжээ.

Эх сурвалж:www.polit.mn