Т.САЙХАН

"Оюутолгой бүлэг ордын ашиглалтад Монгол Улсын эрх ашгийг хангуулах, хүртэх өгөөжийг нэмэгдүүлэхтэй холбоотой баримт бичиг, үйл ажиллагаанд хяналт шалгалт хийх" УИХ-ын хянан шалгах түр хорооны сонсгол өнөөдөр /12.08/ эхэлсэн. Энэхүү сонсголд гэрчээр оролцож байгаа Сангийн сайд асан С.Баярцогтын байр суурийг тодрууллаа.   Тэрээр "Оюутолгойн асуудлыг ард түмний өмнө нээлттэй хэлэлцэх нь сайн хэрэг. Гэвч цаг хугацааны хувьд зөв үеийг тооцох хэрэгтэй. Монгол Улс энэ цаг үед хөрөнгө оруулагчтай хоёр асуудлаар хэлэлцээр хийж байгаа. Тэгэхээр энэ асуудалд тус болох нь уу, ус болох нь уу гэдгийг бид тооцох ёстой.

Хоёрдугаарт, Оюутолгойн гэрээтэй холбоотой асуудал, Оюутолгойн гэрээний хэрэгжилттэй холбоотой асуудал Монгол Улсын үндэсний аюулгүй байдалтай холбоотой. Тийм ч учраас нээлттэй ярих ч зүйл байна, ярихгүй ч зүйл байна. Энэ сонсголоос гадна хаалттай ярилцах юм ч маш их бий. Оросын нэг компани Рио Тинтог шүүхэд өгсөн байгаа. Тэр асуудал дээрээ нөхөн төлбөрт нь Оюутолгойн Рио Тинтогийн эзэмшдэг хувийг авна гэсэн саналыг тавьсан байгаа. Мөн арбитрын шүүх дээр татварын маргаан явсаар байна. "Хан ресурс" дээр бид эвлэрлийн гэрээ хийгээгүйгээс болж маш их алдагдал хүлээсэн. Ийм сургамжуудаа давтахгүй байх ёстой. Хүмүүс маш их улстөржиж байна. Оюу толгойн хөрөнгө оруулалт хийгдсэний хүчинд манай улс 2008, 2009 оны эдийн засгийн хямралыг амжилттай давж гарсан" гэлээ.

Эх сурвалж:www.polit.mn