Т.САЙХАН

Үндсэн хуулийн цэц 2025 оны арванхоёрдугаар сарын 12-нд хийхээр товлоод байсан Их суудлын хуралдаанаа хойшлуулж, хурлын шинэ товыг дараа зарлахаар боллоо. Уг хуралдаанаар Дээд шүүхийн нийт шүүгчийн 2022 оны гуравдугаар сарын 9-ний өдрийн 11 дүгээр тогтоолоор баталсан “Эрүүгийн хуулийн 1.10 дугаар зүйлийн 2 дахь хэсгийг хэрэглэх талаар албан ёсны тайлбар” нь Үндсэн хууль зөрчсөн эсэхийг хянан шийдвэрлэх байв.

Маргаан нь тус албан ёсны тайлбар нь Үндсэн хуулийн Цэцийн 2021 оны 1 дүгээр тогтоолоор хүчингүй болгосон зохицуулалтыг агуулгаар нь дахин сэргээсэн эсэхтэй холбоотой юм. Ингэснээр Дээд шүүхийн тайлбар нь Үндсэн хуулийн дараах заалтуудыг зөрчсөн байж болзошгүй гэж үзэн маргаанд хяналт хийхээр төлөвлөсөн. Үүнд:

• Үндсэн хуулийн 1 дүгээр зүйлийн 2 дахь хэсэг: “…хууль дээдлэх нь төрийн үйл ажиллагааны үндсэн зарчим мөн.”
• 67 дугаар зүйл: “Үндсэн хуулийн цэцийн шийдвэр гармагцаа хүчин төгөлдөр болно.”
• 70 дугаар зүйлийн 1 дэх хэсэг: “Үндсэн хуульд … төрийн байгууллагын бусад шийдвэр бүрэн нийцсэн байвал зохино.”

Эдгээр үндэслэлүүдийн дагуу маргааныг хянан шийдвэрлэх байсан ч Цэц их суудлын хуралдааны товыг дахин тогтоохоор шийдвэрлэж, хойшлуулсан байна.

Эх сурвалж:www.polit.mn