Т.САЙХАН

УИХ дахь МАН-ын бүлгийн хурлаар хэлэлцсэн асуудлын талаар УИХ-ын гишүүн Эдийн засаг, хөгжлийн сайд Ж.Энхбаяр мэдээлэл хийв. Тэрээр “Өмнөх оны статистикаар Монголд Улс 162 оронтой худалдаа хийсэн. Нийтдээ 27.4 тэрбум ам.долларын худалдааны эргэлт хийсэн. Үүнээс 15.8 тэрбум ам.долларын экспорт, 11.6 тэрбум ам.долларын импорт хийсэн. Мөн гадаад худалдаанд 4.2 тэрбум ам.долларын ашигтай тэнцэл хийсэн байна. Манай худалдааны хоёрдогч гол хөрш бол Евразийн эдийн засгийн холбооны таван улс байдаг. Үүнээс голлох нь ОХУ 2.7 тэрбум ам.долларын худалдан авалт хийсэн. Гэвч худалдааны тэнцлийн хувьд өндөр алдагдалтай байгаа. Евразийн улсуудад Монгол Улсын бараа 15-50 хувийн гаалийн татвартай, эрүүл ахуйн хорио цээрийн өндөр шаардлагатай, экспортын боломжийн хувьд хязгаарлагдмал байсан. Засгийн газрын сүүлийн таван жил хийсэн хэлэлцээрийн үр дүнд Евразийн орнуудтай Монгол Улс гурван жилийн чөлөөт худалдааны хэлэлцээ байгуулахаар тохиролцлоо. Энэ гэрээгээ УИХ-д соёрхон батлуулахаар өргөн барьсан. Уг гэрээнд нийтдээ 364 нэр төрлийн барааг багтаасан. Уг гэрээнд тарифыг бууруулах, тарифыг шууд тэглэх, тарифын хөнгөлөлт эдлэх гэсэн заалтуудыг оруулсан. Түүнчлэн улаан буудай, өндөг зэрэг хүнсний бүтээгдэхүүний гадна нөлөөллийг бага байлгахаар онцгой анхаарч ажиллаа. Гэрээний явцад нийт 23 төрлийн бараан дээр маргаан үүссэн. Түүнээс найман барааг хэлэлцээрээс хасуулахаар санал тавьсан. Үүнд өтгөрүүлсэн сүү, шингэн сүү, цөцгий, сонгино, өргөст хэмх, төмс, лууван, манжин зэрэг багтаж байгаа. Энэ саналыг Евразийн тал хүлээн авсан. Хэлэлцээрийн үр дүнд 11 төрлийн бараанд тариф болон квотод татварын буулт хийсэн. Евразийн эдийн засгийн холбоотой гэрээ хийснээр манай улсын экспорт 24.1 хувиар өсөх боломжтой гэсэн тооцоо гарсан.Мах махан бүтэгдэхүүн, ноос ноолуур, нэхмэл сүлжмэл, арьс ширний боловсруулах үйлдвэрийн бүтээгдэхүүн 42-152 хувиар нэмэгдэж манай бүтэгдэхүүн гаалийн татваргүй өргөн зах зээлд гарах боломж нөхцөл бүрдэнэ. Евразийн улсууд хөдөө аж ахуйн салбарын бүтээгдэхүүнд арван тэрбум ам.долларын худалдан авалтыг хийдэг зах зээл дээр манай бүтээгдэхүүн татварын хөргөлттэйгөөр өрсөлдөнө. Тус гэрээг УИХ-аар соёрхон баталсан нөхцөлд бусад таван орон парламентаараа дамжуулан батална” гэлээ.

Эх сурвалж:www.polit.mn