Т.САЙХАН

МАН-ын дарга Н.Учрал, Ерөнхий нарийн бичгийн дарга Я.Содбаатар нар мэдээлэл хийлээ. Н.Учралын мэдээллийг тоймлон хүргэж байна. 

- Их хурлын 2255 төлөөлөгчийн саналыг үндсэн дүрэмдээ тусгаж өгсөн. 

- Бага хурлыг анх удаа 40 хувь нь эмэгтэйчүүдээс бүрдсэн бүрэлдэхүүнтэйгээр байгууллаа.

- Удирдах зөвлөлийн 39 гишүүн, орон тооны таван Нарийн бичгийн дарга, орон тооны бус гурван Нарийн бичгийн дарга тус тус сонголоо. 

- Намын санхүүжилтийг ил болгож, бүх түвшинд авлига ашиг сонирхлоос ангид байж, гишүүдийнхээ оролцоог нэмэгдүүлж, сахилга хариуцлагыг нэмэгдүүлж ажиллана. Удахгүй Удирдах зөвлөлийн дэргэд Намын санхүүжилтийн ил тод байдлыг хариуцсан хороо байгуулна. 

- Удирдах зөвлөлд тодорхой албан тушаалтнууд квотоороо багтдаг. Жишээ нь, УИХ-ын дарга, Ерөнхий сайд, УИХ-ын дэд дарга, ЗГХЭГ-ын дарга, намын дэргэдэх ТББ-ын Ерөнхийлөгч нар гэх мэт. МАН-ын дэргэдэх СДМЭХ-ны Ерөнхийлөгч нь УИХ-ын гишүүн Х.Булгантуяа. Тийм учраас Х.Булгантуяа МАН-ын Удирдах зөвлөлд орж ирсэн. СДМЭХ чуулганаа зохион байгуулж, шинэ Ерөнхийлөгч сонговол тэр хүн нь Х.Булгантуяагийн оронд МАН-ын удирдах зөвлөлд орж ирнэ. 

- Төсөв дөнгөж батлагдсан энэ цаг үед Засгийн газраа тогтвортой байлгах нь чухал. Намын асуудал бол намын асуудал. Харин Засгийн газар бол тусдаа асуудал. Тэгэхээр би Тэргүүн шадар сайдаар ажиллаж байгаагын хувьд Засгийн газрынхаа тогтвортой байдлыг хангаж, хамгаалж, бас хяналт тавьж ажиллана. 

- УИХ-ын даргад хэнийг нэр дэвшүүлэх нь МАН-ын Удирдах зөвлөлийн шийдэх асуудал. 

- Хяналтын ерөнхий хороо шинэчлэгдэж, анхны хурлаа хийсэн. Хяналтын ерөнхий хороог маш олон ажил хүлээж байгаа. Жишээ нь, ХЗДХ-ийн сайд Б.Энхбаярыг намаас хөөсөн гэх асуудлыг Хяналтын ерөнхий хороогоор дахиж хэлэлцэх шаардлагатай болж байна гэв. 

Эх сурвалж:www.polit.mn